Törkiyä tışqı êşlär ministrı Xaqan Fidan, İran başqalasında uzğan yuğarı däräcäle oçraşulardan soñ, Änkara belän Tähran arasında säwdä, ênergetika, çik idäräse häm töbäk iminlege ölkälärendäge xezmättäşlekne sizelerlek kiñäytüne maqsat itep quyuların assızıqladı.

Fidan yäkşämbe könne Tähranda İran tışqı êşlär ministrı Abbas Arakçi belän uzdırılğan urtaq matbuğat oçraşuında ike yaqnıñ iq’tisadıy bäyläneşlärneñ potenśialdan küpkä tübän buluı turında urtaq fikerdä buluların äytte.

“İq’ti­sad häm ênergetika — iñ östenlekle mäs’älälär, bügen tagın ber tapqır kürdek - küp êş başqarırğa kiräk”,- dide ul häm ike kürşe il  arasında ozaq däwam itkän koordinaśiyäne assızıqladı.

Ul monnan tış, çik qapqaları sanın arttıru, kerü-çığu prośessların ciñeläytü häm yaña logistika belän transport proyektların alğa cibärü öçen êşläyäçäklären äytte.

 “İzrail — Yaqın Könçığıştağı totrıqlılıqqa iñ zur qurqınıç”

Xaqan Fidan töbäk mäs’älälärenä tuqtalıp, Gazzädäge wäzğıyät’, Livan, Süriyädäge kiyerenkeleklär häm İzrailneñ êkspansionistik säyäsätenä qağılışlı borçılularnı nigeznamä itep kürsätep, İzrailne Yaqın Könçığıştağı totrıqlılıqqa iñ zur qurqınıç itep kürüen belderde.

 “Xalıqara cämäğat’çelek üz cawaplılığın ütärgä tiyeş” dip belderde ul häm töbäk iminlegen täêmin itü öçen global’ basımnı köçäytergä çaqırdı.

Fidan däwam itüçe atom -töş  söyläşüläre qısasında İranğa teläktäşlegen raslap, ğädel tügel dip bäyälägän sankśiyälärne beterergä çaqırdı häm Tährannıñ çişelmägän mäs’älälärne xalıqara xoquq nigezendä çişüe kiräklegen assızıqladı.  

Ul şulay uq Rusiya—Ukraina suğışın tuqtatuğa yunältelgän diplomatik tırışlıqlarnı Törkiyäneñ xuplawın da yañarttı.

 Tärtipsez miğraśiyägä qarşı köräş

Fidan Törkiyä belän İrannıñ  Äfğanstannan kilgän tärtipsez migraśiyägä qarşı koordinaśiyälängän adımnar turında fiker alışuların belderde häm bu mäs’äladä konkret xezmättäşlekkä çaqırdılar.   

İke yaqlı mönäsäbätlärne tiränäytü qısasında Änkara İrannıñ Törkiyäneñ könçığışındağı Van vilayätendä yaña konsullık açu planın xupladı.

 Fidan Arakçi belän bergä açılışta qatnaşaçağın belderde.

İke ministr şulay uq Törkiyä–İran Yuğarı däräcäle xezmättäşlek şurasınıñ 9 nçı ilbaşı däräcäsendäge oçraşuın qısqa waqıtta ütkärü öçen kileştelär.