Törkiyä Cömhüriyäte ilbaşı Räcäp Täyyip Ärdoğan 25 nçe sentyabr’dä AQŞ ilbaşı Donal’d Tramp belän oçraşu öçen Aq Yortqa baraçağın häm säwdä, investiśiyälär, saqlanu sänäğate ölkälärendä xezmättäşlekkä bağışlanğan söyläşülär ütkäräçägen belderde.
İlbaşı bu oçraşunıñ töbäktäge suğış häm qarşılıqlarnı tuqtatuğa öleş kertäçägenä ömetlänüen äytte.
Ärdoğan Änkarada jurnalistlarğa:
"Tramp belän oçraşuıbıznıñ urtaq global’ tınıçlıq vizionıbız qısasında töbägebezdäge suğış häm qarşılıqlarnı tuqtatuğa öleş kertäçägenä, illärebez arasındağı xezmättäşlekne tağın da nığıtaçağına ışanam”, – dip belderde.
Ul şulay uq: “Aq Yortta säwdä, investiśiya häm saqlanu sänäğate turında söyäşäçäkbez”, – dip östäde.
Tramp Ärdoğan belän yaxşı mönäsäbätenä basım yasadı
AQŞ ilbaşı Tramp monnan alda “Truth Social” platformasında urtaqlaşqan yazmasında bu vizitnıñ bulaçağı turında yazğan ide.
"İlbaşı belän Boeing oçqıçların zur külämdä satıp alu, möhim F-16 kileşüe häm näticäle bulır dip kötelgän F-35 söyläşülären däwam itü kebek berniçä säwdä häm xärbi kileşü östendä êşlibez”, – dip yazdı.
Tramp şulay uq: “İlbaşı Ärdoğan belän mönäsäbätlärebez härwaqıt bik yaxşı buldı. 25endä bulaçaq oçraşunı kötäm”,– dide.
Ärdoğan soñğı tapqır 2019 nçı yılda Trampnıñ berençe ilbaşı çorında Aq Yortqa säfär qılğan ide.
İke lider 2017–2021 yıllarda yaqın şäxsi mönäsäbätlären däwam ittelär, läkin Vaşingtonnıñ Süriyädä “PKK” kontrolendäge “SDF“ terror oyışmasına yärdäm kürsätüe häm Änkaranıñ Mäskäw belän saqlanu xezmättäşlege säbäple mönäsäbätlär kiyerenke tös aldı.
Törkiyä 2019nçı yılda berlektäşläreneñ, bigräk tä AQŞnıñ Patriotlar aşa üzenä citärlek hawa saqlanu mömkinlekläre birä almawı säbäple, Rusiyädän S-400 raketa saqlanu sistemaların satıp aldı.
Vaşington Törkiyäneñ legal’ iminlek borçıluların isäpkä alu urınına, Törkiyäneñ bu mäs’älädäge investiśiyälärenä qaramastan, F-35 oçqıçların Törkiyägä satunı ğamäldän çığarıp häm Änkaranı citeşterü programmasınnan çığarıp, cawap qaytardı.
Bu oçraşu Änkaranıñ Vaşington belän dä, Mäskäw belän dä mönäsäbätlärne balanslarğa tırışqan häm regional’ konfliktlarda aradaşçı rol’ başqarunı üz östenä alğan çorda tormışqa aşa.
