“Törkiyä AQŞ belän İran arasındağı kiyerenkelektä aradaşçı bulırğa äzer”

Törkiyä ilbaşı Räcäp Täyyip Ärdoğan comğa könne İran ilbaşı Mäsud Päzäşkiyan belän telefon söyläşüendä ike yaqlı mönäsäbätlär häm töbäktä köçäyä barğan xärbi kiyerenkeleklär turında süz alıp bardı.

Törkiyä ilbaşı idaräseneñ êlemtä bülege belderüenä qarağanda, ike citäkçe Törkiyä–İran mönäsäbätläre, AQŞ belän İran arasındağı soñğı kiyerenkeleklärdän kilep tuğan iminlek qurqınıçları turında da fiker alıştı.

Söyläşü barışında Ärdoğan kiyerenkelekne kimetü häm mäs’älälärne xäl itü öçen Törkiyä­neñ İran belän AQŞ arasında aradaşçı role başqarırğa äzer buluın assızıqladı.

Belderüdä äytelgänçä, Ärdoğan­ Päzäşkiyanğa comğa könne başqala Änkarada İran tışqı êşlär ministrın qabul itäçägen dä citkerde.

İran tışqı êşlär ministrı Abbas Arakçi comğa könne yasağan belderüendä, töbäktäge awırlıqlarnı ciñü öçen Törkiyä belän İran arasında yaqın koordinaśiya häm daimi kiñäşmälär bik möhim dip assızıqladı.

İstanbulğa räsmi säfär waqıtında İran däwlät televideniyesenä äñgämä birgän Arakçi, aylar aldan planlaştırılğan bu säfärneñ Törkiyä tışqı êşlär ministrı Xaqan Fidannıñ säfärennän soñ başqarıluın häm vizitnıñ ike yaqlı, regional’ häm xalıqara mäs’älälärne qaraw maqsatın küzdä totuın äytte.

Arakçi bolay dide:
“İran belän Törkiyä — härwaqıt tığız kiñäşläşülär alıp barğan möhim kürşe däwlätlär. Säyäsi, iq’tisadi, sośial’ häm mädäni ölkälärdä nıqlı bäyläneşlärebez bar, töbäk mäs’älälärendä isä bez daimi räweştä fiker alışabız”.

İran tışqı êşlär ministrı şulay uq, AQŞ häm başqa aktyerlar bilgelägän maqsatlar ike däwlätneñ üz poziśiyälären koordinaśiyäläwne, töbäktäge täräqqiyät’lärne küzdän kiçerüne häm xäzerge qıyınlıqlarnı niçek xäl itärgä kiräklege  turında fiker alışunı taläp itä dip bilgeläp ütte.

Arakçi­neñ comğa könne tışqı êşlär ministrı Xaqan Fidan häm ilbaşı Räcäp Täyyip Ärdoğan belän oçraşuı planlaştırıla.