AQŞ köçläre şimbä kiçendä Venesuêla yarlarında qanunsız narkotiklar taşuı sanaluçı tağın ber köymägä höcüm itte, dip belderde AQŞ ilbaşı Donald Tramp. Ul, şulay uq, narkotiklar äyläneşen qorı cir yullarında da tikşerä başlayaçaqların äytte.
Tramp bu süzlärne yakşämbe könne Norfold xärbi-diñgez bazasında “Harry S. Truman” oçqıç yörtüçe korab yanındagı çığışında äytte.
“Soñgı atnalarda xärbi-diñgez flotı bezneñ missiyäne tormışka aşıru öçen kartel terrorçıların su östennän yuq itüdä yärdäm itte... kiçä tağın ber höcüm yasadık. Xäzer inde alarnı tabıp bulmıy,” – dide Tramp.
AQŞ räsmiläre mäğlümatlarına kürä, bu höcümnär näticäsendä älegä qadär, kim digändä, 21 keşe ülgän.
Aq Yort belderüençä, moña qadär dürt köymä şartlatılgan häm bu narkotiklarnıñ AQŞka kilep citüen tuqtatqan.
Cir östendä xärbi çaralar kön üzägendäme?
Tramp üz säyäsäteneñ uñışlı buluın äytte häm xärbi çaralarnı qorı cir yullarına da kiñäytü mömkinlege turında belderde.
“Alar diñgez aşa inde kilmi, dimäk, xäzer cir yullarına kararga turı kiläçäk. Läkin min sezgä xäzer ük äytäm: bu alar öçen uñışlı bulmayaçak,” – dide ul.
Tramp tağın ber ülemgä kitergän höcümneñ “kiçä” buluın äytte.
Läkin Pentagon tarafınnan soñgı iğlan itelgän höcüm comga könne bulgan, ul waqıtta räsmilär Venesuêla yarlarında “narko-terrorçı” dip atalgan dürt keşeneñ üterelüe turında beldergän ide.
Demokratlar häm küp kenä xoquq belgeçläre çit il yäki xalıqara sularında şiklänep totılgan yäki soraştırılmagan keşelärgä qarşı köç qullanunıñ qanunlılıgın soraw astına kuya.
