Ukraina Milli qurqınıçsızlıq häm saqlanu şurası särqatibe Rüstäm Umerov Rusiya belän turıdan-turı söyläşülär ütkärü öçen Ukraina delegaśiyäse belän İstanbulğa kilde. Oçraşular sişämbe könne ütkärelde.

Umerov “Telegram”dağı belderüendä säfärneñ maqsatı Rusiya belän suğış äsirlären almaşunı yañadan başlatu dip citkerde.
Umerov: “Bu könnärdä Törkiyädä häm Yaqın Könçığış illärendä almaşu prośessına yul açu öçen êşläyäçäkmen. Kileşü bar ide häm bez anı tormışqa aşırırğa tiyeş”,-dide.

Umerov süzlärenä qarağanda, Törkiyädäge cıyılışlar almaşularnı yañadan başlatu turında söyläşü öçen planlaştırılğan.

 Oçraşularda kemnär qatnaşaçağı turında centekle mäğ’lümat birelmäde.

Rusiya belän Ukraina 23 iyül'dä İstanbulda ütkärgän soñğı turıdan -turı söyläşülärdä suğış äsirläre häm grajdannarnı almaşu turında kileşügä ireşkän ide.

Mäskäw Kiyevkä säyäsi, gumanitar häm xärbi mäs’älälärdä onlayn räweştä êşläyäçäk öç törkem buldıru täq’dimen yasadı. Soñraq Kreml’ bu täq’dimgä Kiyev yağınnan cawap bulmawın belderde.

 Törkiyädän tış, Berläşkän Ğaräp Ämirlekläre häm öleşçä Soğud Ğaräbstanı belän Qatar da Rusiya belän Ukraina arasındağı almaşularda aradaşçı buldı.