Awrupanıñ tönyağında “Goretti” buranı küzätelä, comğa könne Franśiya häm Britaniyadä köçle cillär iste. Salqında yöz meñlägän öydä ut bette.

Britaniyadan alıp Germaniyağa qädär hawa torışın farazlawçılar keşelärne öydä qalırğa çaqırdı.

Franśiyadä “Enedis” ênergiya çeltäre, yaqınça 380 meñ öyneñ utsız qaluın xäbär itte. Alarnıñ zur öleşe tönyaqtağı Normandiya ölkäsendä. “BBC” isä Britaniyada yaqınça 65 meñ öydä êlektrnıñ özelüen citkerde.

Räsmi zatlar beldergänçä tön buyı Franśiyaneñ tönyaq-könbatışındağı Manş ölkäsendä cil säğätenä 216 häm 213 çaqrım tizlek belän iskän.

Räsmi zatlarğa kürä buran berniçä urında ağaçlarnı awdarğan häm kimendä ber ağaç Franśiyaneñ Seine-Maritime ölkäsendäge binalarğa bärelgän, yaralanuçılar yuq.

Britaniyneñ Meteorologiya ofisı qayber töbäklärdä tizlege säğätenä 160 çaqrım bulğan cilneñ kötelüen häm bik zur dulqınnar yar buyındağı toraq punktları öçen qurqınıç şartlar tudıraçağın açıqladı.

Şulay uq Uêls, Angliyaneñ üzäk öleşläre häm tönyağınıñ qayber urınnarı öçen sarğılt qızıl töstä sörän salındı, qar kisätüe yasaldı. Qayber cirlärdä 30 santimetrğa qädär qar kötelä.

Berläşkän patşalıq milli timer yulları kiläse ike köndä poyezd säfärläreneñ tuqtatp toraçağın belderde.

Mäktäplärdä yal, yullar yabıq

Franśiyaneñ tönyağında mäktäplär yabıldı.

Manş vilayät idaräse X platformasında bolay dip yazdı: “Sıyınur urın tabığız häm maşinağa utırmağız!”. Şulay uq xalıqqa çista su äzerlärgä kiñäş itte.

Awrupadağı tiskäre hawa şartları arqasında kim digändä 8 keşe ülde. Pänceşämbe könne Albaniyaneñ Durres şähärendä Balkanda berniçä kön küzätelgän qar häm köçle yawım-töşemnän soñ poliśiya sulardan ber mäyetne çığardı.

Germaniyaneñ tönyağındağı qar buranı mäktäplär, xastaxanälär häm yullar yoğıntı yasadı.

Klimat krizisı näticäse

Germaniyaneñ Meteorologiya xezmätendä êşläwçe Andreas Valter äytüençä soñğı berniçä yılda cılınunıñ küzätelüenä qaramastan qarlı salqın aylarnıñ buluı haman da mömkin läkin älege waqıyğalar kiläçäktä kimiyäçäk.