Kön’yaq Koreya Koreya yarımutrawına “Hyunmoo-5” raketasın urnaştıraçaq

Saqlanu ministrı Ahn Gyu-back süzlärençä, Kön’yaq Koreya Tön’yaq Koreyanıñ atom-töş yanawı artu säbäple däxşät tigezlege urnaştıru qısasında köçle “Hyunmoo-5” ballistik raketasın yıl azağına qadär urnaştıra başlayaçaq.

Ul pänceşämbe könne “Yonhap” xäbär agentlığına birgän äñgämäsendä “Hyunmoo-5”ne seriyäle citeşterü başlanuın, citeşterü quäten arttıru adımnarı yasaluın assızıqladı.

Ahn Gyu-back:

“Atom-töş qoralları taraluın çikläw turındağı kileşüdä qatnaşqan il bularaq, bez atom-töş qoralına iyä bula almıybız, şuña kürä däxşät tigezlege urnaştıru öçen bezdä bilgele ber miq’darda “Hyunmoo-5” raketaları bulırğa tiyeşlegenä ışanam”, – dide.

Cimergeç köçe arqasında “canwar raketa” dip ataluçı “Hyunmoo-5” – cir astındağı sıyınu urınnarın yuqqa çığara alğan ballistik raketa.

Bu raketa berençe tapqır uzğan yıl Qorallı Köçlär köne tantanasında tanıtılğan ide.

Ahnnıñ soñğı belderüläre Tön’yaq Koreyanıñ ütkän atnadağı xärbi paradta “Hwasong-20” yaña qıytğalarara ballistik raketasın berençe tapqır tanıtuınnan soñ yasaldı.

Ul Tön’yaq Koreyanıñ bu yaña ballistik raketanı bıyıl oçırtırğa tırışaçağın äytte.