Törkiyä Cömhuriyäte ilbaşı Räcäp Täyyip Ärdoğan “Xamas”nıñ AQŞ ilbaşı Donal'd Trampnıñ Ğazzä öçen täq’dim itkän utnı tuqtatu planına birgän cawabın konstruktiv häm daimi tınıçlıq urnaştıruda ähämiyätle adım dip bäyäläp, İzrailne Ğazzädäge genośidnı tiz arada tuqtatırğa çaqırdı.
“Xamas”nıñ cawabınnan soñ xäzerge waqıtta İzrailneñ barlıq höcümnären şunduq tuqtatuı häm utnı tuqtatu planın ütäwe kiräk” dip belderde Ärdoğan comğa könne yasağan belderüendä.
Ul “Xamas”nıñ barlıq totqınnarnı irekkä cibärüne qabul itüen häm Donal'd Trampnıñ İzrailgä Ğazzäne bombalawnı tuqtatu boyırığı birüen xäterlätte.
Ärdoğan: “Ğazzägä gumanitar yärdäm aşığıç räweştä citkerelergä häm bu genośidnı tuqtatu öçen barlıq adımnar yasalırğa tiyeş”,- dip äytte.
Ärdoğan Törkiyäneñ söyläşülärneñ Fälästin xalqı öçen iñ faydalı räweştä tämamlanuı häm xalıqara cämäğat’çelek yaqlağan ike däwlätle çişeleşne tormışqa aşıru öçen bar köçen quyıp êşläwne däwam itäçägen assızıqladı.
Tışqı êşlär ministrlığınnan yasalğan belderüdä dä “Xamas”nıñ cawabınıñ Ğazzädä tiz arada utnı tuqtatuğa, töbäkkä gumanitar yärdämne özleksez citkerügä häm daimi tınıçlıq urnaştıruı öçen kiräkle adımnarnı başqarırğa mömkinlek tudıraçağı äytelde.
Belderüdä barlıq yaqlar tiz arada söyläşülärne başlarğa çaqırıldı häm “İzrail Ğazzä xalqına höcümnären tuqtatırğa tiyeş” diyelde.
Ministrlıq Änkaranıñ söyläşülärne yaqlawnı häm konstruktiv öleş kertüne däwam itäçägen belderde.
“Xamas”nıñ cawabı
Törkiyä räsmi zatlarınıñ belderüläre “Xamas” Donal'd Trampnıñ täq’dimenä räsmi räweştä cawap birgännän soñ yasaldı.
“Xamas“ barlıq İzrail äsirlären azat itärgä, ülüçelärneñ mäyetlären tapşırırğa häm Ğazzäneñ idaräsen bäysez fälästinle texnokratlar xökümätenä tapşırırğa rizalaştı.
Donal'd Tramp “Xamas”qa planın räsmi räweştä raslar öçen Vaşington waqıtı belän yäkşämbe könne 18:00 säğat’kä (22:00 GMT) qadär waqıt birde.
Planğa kürä, Ğazzä AQŞ ilbaşı citäkçelegendä, xalıqara oyışma kontrolendä qorallardan arındırılğan töbäkkä äyländereläçäk.
Plan 72 säğat’ êçendä totqınnar belän almaşu, bäreleşlärne tuqtatu, Ğazzädäge qorallı törkemnärne qoralsızlandıru häm İzrail köçläreneñ êtaplı bularaq kire çigenüen üz êçenä ala.
