Törkiyäneñ berençe keşesez su öste apparatı şirkäte Soğud Ğaräbstanı belän xezmättäşlek itä
Törkiyäneñ "ULAQ Global" şirkäte Soğud Ğaräbstanınıñ "SAMI Otonom" şirkäte belän xezmättäşlek kileşüe imzaladı.
Törkiyäneñ berençe keşesez su öste apparatı (USV) citeşterüçese "ULAQ Global Autonomous Systems" Soğud Ğaräbstanı däwlät täêminat fondınıñ (PIF) qul astında bulğan "SAMI Autonomous Company" belän keşesez diñgez sistemalarında xezmättäşlekne nığıtu öçen kileşü imzaladı.
Riyadta ütkärelgän Bötendönyä saqlanu kürgäzmäsendä (WDS 2026) imzalanğan kileşü, Soğud Ğaräbstanında keşesez diñgez sistemaların proyektlaw, üsterü, citeşterü, sistema integratsiyäse häm qarap-totu ölkälärendä külämle xezmättäşlek qısasın buldırunı maqsat itep quya.
Bu ölkädä Soğud Ğaräbstanında imzalanğan berençe kileşü bulğan älege xezmättäşlek, ilneñ diñgezçelek häm saqlanu mömkinleklärenä zur öleş kertäçäk häm "Vizion 2030" maqsatları belän turı kiläçäk.
"ULAQ Global" idarä şurası äğzası Käräm Kalafatoğlu “Anadolu Agentlığı”na yasağan belderüendä ike firma arasındağı kileşüneñ, berençe çiratta, urtaq üseş, texnologiyä tapşıru häm apparatlarnıñ cirle citeşterüen maqsat itüen äytte.
“Êşçänlegebez barı tik Soğud Ğaräbstanı belän genä tügel, dönyä külämendä däwäm itä,” di Kalafatoğlu häm bolay däwam itä: “Bu initsiativa bezgä totrıqlı tabış alu mömkinlege biräçäk häm bez “ULAQ USV”nı barı tik Soğud Ğaräbstanına ğına tügel, dönyanıñ qalan öleşenä dä êksportlarğa niyatlibez”.
Törek firması "ULAQ Global" yıllar buyı tuplanğan belem häm täcribäsen Soğud partnyerı belän büleşep, Soğud Ğaräbstanındağı cirle USV citeşterüenä öleş kertäçäk.