Törkiyäneñ tönyaq-könbatışında urnaşqan borınğı Troya şähärendä qazınular ütkärgän arxeologlar 4,500 yıllıq altın broş häm siräk oçrıy torğan böyertaş (nefrit) taptı Bu xaqta ilneñ mädäniyat häm turizm ministrı xäbär itte .

Mäxmät Nuri Ärsoy şimbä könne bu tabış turında sośial platformada belderde häm broşqa "soñğı yöz yılda İrtä bronz çorına qarağan iñ möhim tabıldıqlardan berse" dip bäyä birde.

Ul bu broşnıñ dönyada barı tik öç ürnäge genä buluın häm Törkiyädägeseneñ iñ yaxşı saqlanğanı ikänen äytte.

Äsärlär Çanakkalädäge Troya muzeyında kürsäteläçäk.

Troya II urnaşu qatlamnarında tabılğan äyberlär bezneñ êrağa qadär yaqınça 2500nçe yıllarğa qarıy. Ministrlıq bu tabıldıqnıñ Troya II çorınıñ başlanuı turında küptännän däwam itüçe bäxäslärne çişärgä yärdäm itäçägen belderde.

Ärsoy böyertaşnıñ 4,500 yıl êlek zinnätle äyber bulıp sanaluın assızıqladı. Şul uq qatlamda tabılğan bronza ênä belän bergä bu äyberlär Çanakkalädäge Troya muzeyında kürgäzmägä quyılaçaq.

160 yıldan artıq waqıt däwamında arxeologlar Gomer êpośları "İliada" häm "Odissiya"da mäñgeläşterelgän borınğı Troya şähären öyränä. 1998nçe yıldan birle ul YUNESKO Dönya mirası isemlegendä tora häm dönyanıñ iñ möhim arxeologik urınnarınıñ berse bulıp sanala. Bu urın irtä Anadolu şähärläşüe häm säwdäse turında mäğlümat birä.

Ministrlıq äsärlärneñ "tabulğan urınnarınıñ tarixın yaqtırtuğa" yärdäm itäçägen häm alarnı tabılğan urınnarında kürgäzmägä quyaçaqların äytte.