Cirle matbuğat xäbär itüençä, Äfğanstanda internet özelep tora, monıñ säbäbe fiber optik xezmätlärneñ tuqtap toruı bulırğa mömkin häm bu Talibannıñ äxlaqsızlıqnı kisätü kampaniyäseneñ ber öleşe.

Xökümät räsmi zatı düşämbe könne internet özekleklärennän berniçä minut êlek “AFP” ğa fiber optik xezmätlärne tuqtataçaqların häm monıñ käräzle telefon xezmätlärenä dä täêsir itäçägen äytkän.

Ul “Sigez-tuğız meñ çaması telekommunikaśiya bağanası yabılaçaq” dip beldergän häm internet özelüneñ kiläse belderügä qadär däwam itäçägen äytkän.

İnternetqa kerü yaqlawçısı Netblocks xäbär itkänçä, turıdan-turı mäğ’lümatlar Äfğanstanda internetqa totaşunıñ normal’ däräcälärneñ 14%ına qadär töşüen häm il külämendä  telekommunikaśiyäneñ betüen kürsätä.

Oyışma “Bu xalıqnıñ tışqı dön’ya belän êlemtä qoru mömkinleklären citdi räweştä çiklärgä mömkin” dip östäde.  

İl Taliban 2021 nçe yılnıñ avgustında xakimiyätkä kilgännän birle berençe tapqır mondıy xäl belän oçraşa.

“Bu çara äxlaqsızlıqnı kisätü öçen kürelde”

Taliban liderı Xibatulla Axundzadä bu ay başında äxlaqsızlıqnı kisätü maqsatınnan fiber optik xezmätlärne tıyğan qararnamä bastırğannan soñ berniçä provinśiya optik êlemtälären yuğalttı.

Belx provinśiyäse süzçese Attaullah Zaid 16 sentyabr’dä Taliban liderı kürsätmäse belän tön’yaq provinśiyädä fiber optik internetınıñ tulısınça tıyıluın belderde.

Zäyd sośial’ çeltärdä: “Bu çara äxlaqsızlıqnı kisätü öçen kürelde häm totaşu ixtıyacların täêmin itü öçen il külämendä  başqa al’ternativ variantlar ğamälgä aşırılaçaq”,– dip yazdı.

Şäxsi “TOLO News” telekanalı xäbär itkänçä, çığanaqlar fiber optik internetnıñ düşämbedän başlap il külämendä özelä alaçağın raslıy.

Global’ internet- monitoring platforması Cloudflare Radar  citkergänçä, başqala Qabulda internetqa totaşuda iñ kisken töşü küzätelä, annan soñ iñ zur özekleklär könbatıştağı Häratta häm kön’yaqtağı Kandaharda terkälgän.