Yaponiyä üzeneñ saqlanu çığımnarın arttıru niyäten belderde, bu xaqta Yaponiyä saqlanu ministrı Şindziro Koizumi Tokioda AQŞ saqlanu ministrı Pit Hegseth belän oçraşqanda äytte.
Alarnıñ oçraşuı çärşämbe könne buldı, bu Yaponiyä Başministrı Sanae Takaichi belän AQŞ İlbaşı Donald Tramp arasındağı söyläşülärdän soñ buldı. Takaichi şuşı söyläşüdä Yaponiyäneñ "saqlanu mömkinleklären tamırdan nığıtaçağın" häm monı "nıq qararlılıq häm ğämäl belän" başqaraçağın belderde.
Hegseth AQŞnıñ “X" platformasınnan urtaqlaşqan yazmasında: “Bügen saqlanu ministrı Koizumi belän zur oçraşu uzdırdıq. AQŞ-Yaponiyä ittifaqı Aziyä-Tın okeanı töbäge iminlege öçen bik möhim häm min Yaponiyäneñ saqlanu çığımnarın arttıru turındağı soñğı qararın xuplıym. Bergä bez "Köç aşa tınıçlıq" maqsatına ireşä alabız”, - dip yazdı.
Koizumi häm Hegseth milli iminlek turında öç töp dokumentnı yañartu planın söyläştelär: Milli iminlek strategiyäse, Milli saqlanu strategiyäse häm Saqlanunı üsterü programması. “Kyodo” mäğlümatına qarağanda, bu dokumentlar 2022nçe yılnıñ dekabrendä Başministr Fumio Kişida citäkçelegendäge êlekke xökümät tarafınnan raslanğan ide, bu isä suğıştan soñğı saqlanu säyäsätendä zur üzgäreş buldı.
Saqlanu byudjetı maqsatı
Koizumi yapon xökümäteneñ saqlanu çığımnarın tulayım milli tabışnıñ 2%ına citkerüne maqsat itüen belderde. Bu – monnan aldağı yöklämädän ike yılğa aldaraq adım bularaq bäyälänä.
Cıyılıştan soñ oyıştırılğan urtaq matbuğat oçraşuında Koizumi AQŞ wazıyfadaşı belän tiz naçarayğan iminlek moxitı turında fiker alışuların iskärtep uzdı. Hegseth isä AQŞnıñ Yaponiyädän saqlanu çığımnarın tiz räweştä tormışqa aşıruın kötüeb, fäqät söyläşü waqıtında bilgele ber miqdar soramawın belderde.
Bu söyläşü Koizumi saqlanu ministrı bularaq wazıyfasına başlağannan soñ ütkärgän berençe räsmi cıyılışı buldı. Takaichi dä berençe säyäsi çığışında Yaponiyäneñ saqlanu çığımnarın tulayım milli tabışnıñ yaqınça 2%ına kütäräçägen wäğdä itkän ide.
İke il arasında qabul itelgän ikeyaqlı saqlanu kileşüe qısalarında Waşington Yaponiyädä 50 meñnän kübräk ğaskäri, xärbi baza häm caylanmalarnı urnaştırğan.
