AQŞ ilbaşı Donald Trampnıñ wäkilläre ike atna êçendä öçençe tapqır Mayamida Ukraina delegatsiyäse belän oçraşaçaq. Vaşington suğışnı beterü planın üzgärtü belän şöğıllängän arada Rusiyägä qarata qayber iqtisadi çikläwlärne ciñeläytte.

Stiven Uitkoff häm Jared Kuşnernıñ Mäskäwdä Rusiyä ilbaşı Vladimir Putin belän oçraşuınnan ike kön ütügä AQŞ qazna ministrlığı Trampnıñ oktyabr'dä kertkän sanktsiyäläreneñ qayber punktların öleşçä tuqtattı.

Ministrlıq citkergänçä, bu tuqtatu, kimendä, 29 aprel'gä qadär ğamäldä bulaçaq häm ul “Lukoil”nıñ Rusiyä tışında urnaşqan yağulıq stansiyälärenä qarıy.

Tabışlarnıñ Rusiyägä qaytarıluın tıyuçı qararlar isä haman da üz köçendä qala.

2022nçe yılda Ukrainağa bärep kergännän birle Mäskäw AQŞ häm Awrupa Berlegeneñ külämle sanktsiyäläre astında.