Qıtay tışqı êşlär ministrı Van İ Pekin belän İslam illäre töbäktäge töp problemalı mäs’älälärgä säyäsi çişeleşlär tabu öçen iminlek partnyerlığı urnaştırırğa tiyeş dip äytte.
Van düşämbe könne Pekinnıñ üsep kilüçe illärneñ legal’ xoquqları häm mänfäğät’lären yaqlaw, dön’ya tärtibeneñ “urman qanunına” äylänep qaytuına qarşı toru öçen İslam illäre belän bergä êşlärgä äzer buluın citkerde.
Qıtay tışqı êşlär ministrlığınıñ räsmi belderüenä qarağanda, Van bu süzlärne Pekinda İslam xezmättäşlek oyışması ğomum särqatibe Xissein Braxim Taxa belän oçraşu waqıtında äytte.
Van şulay uq Pekinnıñ İslam illäre häm İslam xezmättäşlek oyışması belän mönäsäbätlärne üsterügä härwaqıt strategik ähämiyät birüen häm Tayvan’ mäs’äläsendäge yaqlawı öçen räxmätle buluın belderde.
Qıtay ministrı İslam xezmättäşlek oyışması ğomum särqatibenä: “İke yaq ta töbäktäge qaynar noqtalar problemalarına säyäsi çişeleşlär tabu öçen iminlek partnyerlığı urnaştırırğa, köç säyäsätenä häm qıyırsıtuğa qarşı torırğa, Yaqın Könçığışta tınıçlıq häm totrıqlılıqnı saqlarga tiyeş”,- dip äytte.
Belderüdä äytelgänçä, Taxa İslam xezmättäşlek oyışmasınıñ Qıtaynıñ êçke êşlärenä tıqşınuğa qarşı buluın, Qıtay belän partnyerlıqnı tiränäytergä häm töbäk tınıçlığı, totrıqlılığın bergäläp saqlarğa äzer buluın äytte.
Taxa Qıtaynıñ Fälästin mäs’äläsendä kiñqırlı, daimi häm ğadel çişeleşkä ireşüdäge näticäle öleşen yuğarı bäyäläde häm Qotaynıñ bu ölkädä tağın da zurraq rol’ uynayaçağına ömet belderde.
