Törkiyä ilbaşı Räcäp Täyyip Ärdoğan Änkaranıñ İranğa qarata totışınıñ bik açıq buluın belderep, Törkiyäneñ härwaqıt suğış yaqlı tügel, ä tınıçlıq yaqlı buluın assızıqladı.

İlneñ İranda utnı tuqtatu öçen kürsätkän tırışlıqlarına tuqtalğan Ärdoğan çärşämbe könne yasağan belderüendä utnı tuqtatunı täêmin itü, söyläşülär östälenä qaytu öçen zur tırışlıq quyuların äytte.

“Bez suğış tağın da kiñäymäsen, tağın da kübräk ğomerlär özelmäsen, qan qoyılmasın öçen tırışabız”,- dide ilbaşı.

İzrail citäkçelege ğamällären kisken tänqıyt’lägän Ärdoğan: “Här tönne sıyınu urınnarında ütkärüçe İzrail xalqı da xäzer  Xolokosttan soñ başlarına kilgän iñ zur fäläkätneñ Netanyaxu buluın inde açıqtan -açıq  äytä”,- dide.

AQŞ häm İzrail 28 fevral'dä İranğa urtaq höcümnär oyıştırdı. Bu höcümnär näticäsendä 1300dän artıq keşe , şul isäptän İrannıñ dini citäkçese Ali Xämänäi häm 150dän artıq uquçı qız bala hälaq buldı.

Tähran isä cawap bularaq İzrailgä, şulay uq Yordaniyägä, Ğıyraq häm AQŞ xärbi köçläre urnaşqan törle Farsı qultığı illärenä pilotsız oçu apparatları häm raketa höcümnäre başqardı.