AQŞ ilbaşı Donald Tramp häm Yaponiyaneñ yaña premyer-ministrı Sanaê Takaiti Tokioda möhim mineral häm siräk êlementlar belän täêmin itüne garantiyaläw öçen qısa kileşüen imzaladılar. Aq Yort bu adımnıñ koordinaśiyalängän investiśiya häm ğadel bazar praktikası aşa täêmin itü çeltärlären nığıtunı maqsat itüen belderde.

Aq Yort düşämbe könne beldergänçä AQŞ häm Yaponiya bu maqsatqa iqtisadi säyäsät çaraların qullanıp häm urtaq investiśiyalär aşa ireşergä niyätlänä. Şulay uq möhim minerallar häm siräk oçrıy torğan êlementlar öçen törländerelgän, likvid häm ğadel bazarlar üseşen tizlätü planlaştırıla.

Kileşüdän soñ altı ay êçendä ike il dä AQŞ, Yaponiya häm başqa berlektäş illärne tä'min itü öçen äzer produktlar citeşterüçe proyektlarnı yaqlaw öçen çaralar kürüne maqsat itä.

Vaşington häm Tokio citäkçelekläre şulay uq Aq Yort “bazardan tış säyäsätlär häm ğadel bulmağan säwdä praktikaları” dip atağan problemalarnı quzğatıp, möhim minerallar belän täêmin itü çeltärlären nığıtu öçen bergä êşçänlek başqaraçaq.

Bu kileşü Trampnıñ Yaponiyaneñ berençe xatın-qız liderı bulğan Takaiti belän berençe tapqır oçraşuı waqıtında tözelde. İke lider säwdä, saqlanu häm regional iminlek mäs’älälärenä qaralğan söyläşülär ütkärde.

Takaiti Trampnı Nobel Tınıçlıq bülägenä namzät itep täqdim itärgä äzerlänüen xäbär itärgä niyätlänä. Bu mäğlümatnı “NTV” xökümät çığanaqlarına tayandırıp birä.

Protest çaraları

Oçraşu aldınnan Tokioda küp sanda protestçı AQŞ ilbaşı Donald Tramp säfären häm yaña saylanğan Yaponiya premyer-ministrı Sanaê Takaiti belän küreşüen ğayepläde.

Protestçılar Tramp häm Takaitine tänqitläp häm Yaponiya belän AQŞnı Qıtayğa qarşı kiyerenkelekne arttıruda ğayepläp, plakatlar kütärde.