Aq Yort AQŞ ilbaşı Donald Trampnıñ, Berläşkän Millätlär Oyışması qaramağındağı oyışmalarnı da kertep, distälägän xalıqara berläşmädän çığuın küzdä totuçı memorandum imzalawın belderde.

Aq Yort çarşämbe könge belderüendä: «Bügen ilbaşı Donald Tramp, AQŞnıñ Amerika mänfäğatlärenä xezmät itmäwçe 66 xalıqara oyışmadan çığuın küzdä totqan ilbaşı qararnamäsenä qul quydı. Bolarnıñ 35e BMO qaramağında bulmağan häm 31e BMO oyışması», — dide.

Aq Yort oyışmalarnıñ isemlegen birmäde, tik alarnıñ «AQŞnıñ möstäqıyllege häm iqtisadi quäte belän turı kilmäwçe radikal’ klimat säyäsätlären, global’ idarä itüne häm ideologik programmanı» yaqlawların bilgeläp ütte.

Belderüdä äytelgänçä, bu adım AQŞ äğza yäki yaq bulğan barlıq xalıqara, xökümätara oyışmalarnı, kileşülärne häm añlaşularnı küzdän kiçerü näticäsendä yasalğan.

Aq Yort: «Bu çığular, AQŞ salım tüläwçeläreneñ, ilneñ östenleklären ikençe planga qaldırıp, global’ kön tärtiben yaqlawçı yäki möhim mäs’älälärne näticäsez häm täêsirsez räweştä qarawçı oyışmalarnı finanslawın häm anda qatnaşuın tuqtataçaq. Şul räweşle, AQŞ salım tüläwçeläreneñ aqçaları tiyeşle missiyälärne yaqlaw öçen başqa yullar belän näticäleräk qullanılaçaq», — dip belderde.

Ber yıl êlek ikençe tapqır ilbaşı wazıyfasına kereşkän Tramp, AQŞnıñ BMOga cibärgän fondların kimetergä, BMO keşe xoquqları şurası belän bäyläneşen tuqtatırğa, Fälästin yardäm oyışmasın finanslawnı tuqtatunı ozaytırğa häm BMO mädäniyat agentlığı UNESCOdan çığarğa tırıştı. AQŞ ilbaşı, şulay uq, dönyaküläm sälamätlek saqlaw oyışmasınnan häm Parij klimat kileşüennän dä çıgu plannarın açıqladı.