Venesuêlalı oppoziśiyaçel lider Mariya Korina Maçado Aq Yorttağı söyläşüdä “Nobel” tınıçlıq bülägen AQŞ ilbaşı Donald Trampka tapşıruın belderde.

AQŞ liderı anı artqı planda qaldırsa da, Maçado Aq Yort uñay dip atağan söyläşülär qısalarında Tramp belän oçraştı.

Maduro xökümäten beterü öçen yıllar buyı êşçänlek başqarğan Maçado Tramp belän küreşkännän soñ Aq Yort çitendä üzen xuplawçılar belän küreşte.

Anıñ Trampka büläkne tapşıruı ilbaşı küzlegennän üz abruyın saqlap qalu öçen dip sanalsa da, Norvegiyadağı “Nobel” komitetı büläkne başqalarına tapşırıp bulmıy dip belderde.

Komitet X platformasında bolay dip yazdı: “Nobel” tınıçlıq büläge iğlan itelgännän soñ anı kire alıp bulmıy. Süz, büleşü yäisä başqalarına birü turında barmıy. Qarar – qatğıy. Büläk başqasına küçä ala, läkin “Nobel” tınıçlıq büläge iyäse üzgärmi.”