Törkiyä Cömhüriyäte ilbaşı Räcäp Täyyip Ärdoğan soňğı 11 aylıq çorda Törkiyäneñ saqlanu häm aviaśiya êksportınıñ, uzğan yılnıñ şul uq çorı belän çağıştırğanda, 30%qa artıp 7 milliard 445 million dollarğa citüen belderde.
Şimbä könne Diñgez platformaların faydalanuğa tapşıru, bayraq kütärü häm berençe qorıç kisü tantanasında çığış yasağan Ärdoğan bolay dide: “Xäzerge waqıtta bez saqlanu êksportında dön’yada 11 nçe urında torabız. Soñğı 11 ayda saqlanu häm aviaśiya êksportıbız uzğan yılnıñ şul uq çorı belän çağıştırğanda 30 %qa artıp 7 milliard 445 million dollarğa citte”.
İlbaşı Törkiyäneň saqlanu sänägate proyektlarınıñ barı êşlänmälär citeşterügä genä tügel, ä şul uq waqıtta êkosistemanı häm texnologiyälär citeşterü quäten kinäytügä dä yünältelgän buluın äytte.
“Bez, Törkiyä bularaq, saqlanu sänägate ölkäsendä başqarğan här proyektta êşlänmälär genä tügel, ä texnologiyälär citeşterü quätebezne dä arttırunı maqsat itep quyabız”,-dide ilbaşı Ärdoğan.
“Tınıçlıqnı, bäysezlekne häm kiläçägebezne saqlaw öçen”
Ärdoğan şulay uq Törkiyäneň üz xärbi köymäsen êşläp çığarıp diñgezgä cibärgän 10 däwlätneñ berse buluın belderep,
“Aviataşuçı tözü prośessın da başladıq” dide.
İlbaşı ciröste, diñgez, hawa häm kiber ölkälärendä östämä proyektlarnıñ tormışqa aşırılaçağın, proyektlaw, programma täêminatı häm kümäk citeşterügä qadär barlıq prośesslarnıñ milli häm cirle çığanaqlar belän başqarılaçağın assızıqladı.
Ärdoğan investiśiyälärneñ suğışqa äzerlek maqsatı bulmawın äytep, “Bezneñ maqsatıbız — suğışqa äzerlänü tügel, tınıçlıqnı saqlaw”, — dip belderde.
