Vladimir Putin Awrupa däwlätläreneñ Rusiyä belän bulğan êlemtälären özgännäre öçen tınıçlıq urnaştıru söyläşüläre çitendä qaluın äytte.

Rusiyä liderı sişämbe könne Rusiyäneñ Awrupalı däwlätlär belän suğış telämäwen läkin Awrupa Mäskäw citäkçelege belän turıdan bäreleşergä teläsä, Rusiyäneñ suğışırğa äzer buluın belderde.

Putin Awrupa däwlätlären AQŞ ilbaşı Trampnıñ Ukrainadağı suğışnı beterü tırışlıqlarına qomaçawlawda ğayepläde. Ul Awrupanıñ Mäskäw citäkçelegenä qabul itelmäslek täqdimnär yasap, Tramp iniśiativaların beterep taşlawın häm Rusiyäne tınıçlıq telämäwdä ğayepli alaçaqların äytte.

Awrupalı däwlätlär Rusiyä belän bäyläneşlären özgännäre öçen üzlären Ukraina belän tınıçlıq urnaştıru söyläşüläre çitendä qaldıruların beldergän Putin Awrupa däwlätläre turında: “Alar suğış teläwçe tarafta,” – dide.

Putin şulay uq Qara diñgezdä tankerlarğa oyıştırılğan höcümnärgä cawap bularaq Ukrainanıñ diñgezgä ireşüen özü belän yanadı.

Rusiyä däwlät başlığı televideniyeda belderü yasap: “İñ radikal çişeleş - Ukrainanıñ diñgez belän bäyläneşen özü, ul waqıtta yulbasarlıq tuqtar,” – dide.

Putin Rusiyäneñ Ukraina qorılmalarına häm köymälärenä qarata höcümnärne dä arttıraçağın, Ukrainağa yärdäm kürsätüçe illärneñ tankerlarına qarşı çaralar küräçägen citkerde.