İran tışqı êşlär ministrı Abbas Araqçı comğa könne Omanda AQŞ belän ütkäreläçäk söyläşülär aldınnan Tährannıñ "izge niyät" belän diplomatiyä alıp baruın belderde häm "yöklämälärneñ ütälergä tiyeşlegen" assızıqladı.

Abbas Araqçı “X” sotsial' çeltärendäge yazmasında: "İran diplomatiyägä küzläre açıq räweştä häm uzğan yılnıñ ğazapların istä totıp kerä. Bez izge niyät belän qarıybız häm xoquqlarıbız mäs’äläsendä täwäkkälbez," - dip yazdı. Ul "Yöklämälärgä buysınırğa kiräk," - dip, tigez status, üzara xörmät häm urtaq mänfäğatlärneñ "mäcbüri häm daimi kileşüneñ nigezläre" buluın belderde.

Vaşington häm Tähran comğa könne Omanda atom-töş söyläşüläre ütkärä. Amerika yağın AQŞ ilbaşı Donald Trampnıñ kiyäwe Jared Kuşner häm AQŞnıñ maxsus ilçese Stiv Uitkoff wäkillek itäçäk.

İran delegatsiyäsenä Araqçı räislek itä. Yarım räsmi “Tasnim” xäbär agentlığı İran tışqı êşlär ministrınıñ söyläşülär öçen Oman başqalası Maskatqa kilep citüen xäbär itte.

Atna başında bu oçraşu şöbhäle dip sanalsa da, Aq Yort räsmi zatı “Anadolu Agentlığı”na söyläşülärneñ uzaçağın rasladı.

Planlaştırılğan bu söyläşülär, Farsı qultığında Amerika xärbi köçläreneñ arta baruı häm dekabr' axırında İranda başlanğan protestlardan soñ, AQŞ İlbaşı Donald Trampnıñ xärbi köç qullanu turındağı yanawları belän Vaşington häm Tähran arasındağı kiyerenkelek köçäygän waqıtta uza.

Soñğı könnärdä kiyerenkelekne kimetü öçen küp kenä illär Tähran belän Vaşington arasında aradaşçılıq täqdim itte, ayıruça Törkiyä bu mäs’älädä aktiv rol' uynadı.

AQŞ häm anıñ berlektäşe İzrail İrannı atom-töş qoralı yasarğa tırışuda ğayepli. Tähran isä atom-töş programmasınıñ êlektr ênergiyäse citeşterü kebek tınıç maqsatlarğa yünältelüen belderä.