“Xamas” barlıq fälästinle törkemnär belän milli dialog başlarğa äzer buluın iğ’lan itte.

Bu belderü “Xamas” häm “Fätih” wäkilläre arasında Mısır aradaşçılığı belän Qahirädä uzğan oçraşu belän ber ük waqıtta yasaldı.

Cıyılışta Ğazzädäge utnı tuqtatu kileşüeneñ ikençe êtabı häm töbäkneñ kiläçäge turında söyläşelde.

“Xamas “süzçese Xazem Qassem “Anadolu” agentlığına birgän interv’yusında xäräkätneñ Fälästin idaräse häm başqa milli köçlär belän milli dialog urnaştırırğa teläwen äytte häm idaräneñ iğ’tibarsız qaldırıp bulmaslıq möhim  Fälästin oyışmalarınıñ  berse buluın assızıqladı.

Qassem xäzer milli berdämlek waqıtı buluın, milli mänfäğat’lärnen bar närsädän östen totu kiräklegen assızıqladı.  

Ul xäzerge däwer “Xamas” öçen genä tügel, ä Ğazzä häm Yordannıñ könbatış üzänleendäge  barlıq Fälästin xalqı öçen dä qurqınıç dip kisätte.

“Xamas” süzçese xäräkätneñ Ğazzädäge utnı tuqtatu kileşüen tulısınça ütärgä tuğrı bulıp qaluın yañartıp, aradaşçılarnı İzrailneñ kileşüne ütäwe öçen aña basım yasawğa çaqırdı.

Qassem “Xamas”nıñ berençe êtapnı isän äsirlärne häm mäyetlärne tapşırıp tämamlawın, qalğannarın tapşıru öçen êşläwen äytte.

İkençe êtap

Qassem äytüençä, ikençe êtap aradaşçılar belän tağın da kübräk söyläşü häm bäxäs taläp itä, çönki bu êtap kiñ qırlı mä’sälälärne häm qatlawlı problemalarnı üz êçenä ala.

Ul “Xamas”nıñ töp maqsatınıñ Ğazzä sızığındağı  Fälästin xalqına qarata suğışnı tulısınça häm daimi beterü buluın assızıqladı.

Qassem şulay uq aradaşçılarnı İzrailneñ kileşüne bozu oçraqları turında daimi xäbärdar itülären belderde.

Ul İzrailneñ utnı tuqtatu ğamälgä kergännän birle 90 fälästinlene üterüen häm Räfax çik qapqasın yabıp citärlek yärdäm kerüen totqarlawın äytte.

Ul İzrailne gumanitar şartlarnı säyäsi satulaşu çarası itep qullanuda  ğäyepläde häm monıñ İzrailneñ Ğazzägä yıllar buyı qullanğan ısul  buluın belderde.

Qassem şulay uq Ğazzägä yärdämne tiz arada kiterü häm yañadan açlıq qurqınıçın buldırmaw öçen êşkä kereşergä  çaqırdı.