“İspaniya belän tözelgän “HÜRJET” kileşüe yaña êksport mömkinlekläre tudıra”
Bu xaqta saqlanu sänäğate başlığı Haluk Görgün belderde.
Saqlanu sänäğate başlığı Haluk Görgün İspaniyäneñ bäyäse 2 milliard 600 million yevro bulğan Törkiyäneñ berençe cirle öyrätü oçqıçı “HÜRJET” tan 30 danä satıp alu qararınıñ Änkara öçen yaña êksport mömkinlekläre tudıruın belderde.
Görgün Änkaradağı Törkiyä aviaśiya häm ğaläm sänäğate ob’yektlarında ütkärelgän matbuğat oçraşuında älege kileşüneñ Törkiyäneñ soñğı 20 yıldağı saqlanu sänäğate häm yuğarı texnologiyälär tarmaqlarındağı alğarışın çağıldıruın äytte.
Ul ilbaşı Räcäp Tayyip Ärdoğan citäkçelegendä Törkiyäneñ yuğarı texnologiyälär citeşterüçe, saqlanu sänäğatendä üz ixtıyacların qanäğat’länderüçe, êşläp çığarğan texnologiyälären dus häm berlektäş illär belän urtaqlaşuçı, kön sayın global’ bazardağı urının nığıtuçı ilgä äylänüen asssızıqladı.
Haluk Görgün saqlanu sänäğatendä êçke citeşterü külämeneñ 82-83% tiräse buluın bilgeläp ütte.
Ul Törkiyäneñ xäzerge waqıtta üz ixtıyacları öçen “HÜRJET” oçqıçları citeşterüne däwam itüen, Awrupa Berlege häm NATO äğ’zası İspaniyäneñ texnik bäyäläwlärdän, ike ilneñ hawa köçläre belän fiker alışulardan soñ oçqıçqa qızıqsınu kürsätüen belderde.
“Bez mondıy yuğarı texnologiyäle êşlänmäne İspaniyägä êksportlawğa bik şatbız”,- dide Törkiyä saqlanu sänäğate başlığı Haluk Görgün.
Düşämbe könne İspaniya Törkiyä aviaśiya häm ğaläm sänäğate belän kileşü tözep, 2 milliard 600 million yevrolıq 30 “HÜRJET” oçqıçın satıp alunı räsmiläşterde.