Törkiyä ilbaşı Räcäp Tayyip Ärdoğan AQŞ däwlät särqatibe Êntoni Blinkennı qabul itte. Oçraşuda regional’ xezmättäşlek, Süriyäneñ cir bötenlege, berdämlege häm unitar strukturasınıñ saqlanuı kebek urtaq maqsatlar söyläşelde. Änkarada uzğan oçraşuda şulay uq Ğazzädä utnı tuqtatu häm Fälästin xalqına gumanitar yärdämne arttırunı täêmin itäçäk totqınnar belän almaşu mäs’äläläre qaraldı.
Ärdoğan Süriyäneñ cir bötenlegenä tuğrılığın yañarttı häm “PKK/PYD/YPG” häm “DEAŞ” kebek terror oyışmalarına qarşı köräşneñ qatğıy räweştä däwam itäçägenä basım yasadı.
İzrail qamaw astındağı Ğazzäneñ Nusäyrat qaçaqlar lagerında ber yortqa höcüm oyıştırdı. Hava höcümendä kim digändä 30 fälästinle ğomeren yuğalttı, 40 keşe yaralandı.
Fälästinneñ räsmi xäbär agentlığı “WAFA” beldergänçä, İzrail xärbi oçqıçları lager’dağı berniçä yortqa häm binağa höcüm ittelär. Qorbannarnıñ kübese xatın - qızlar häm balalar.
İzrail BMOnıñ Ğazzädä xastaxanägä cibärgän yärdäm konvoyın totqarladı. Xastaxanä citäkçese beldergänçä, İzrail armiyäse BMOnıñ Ğazzäneñ tön’yağındağı Kämal Advan xastaxanäsenä yağulıq häm mediśina kiräk - yaraqları alıp baruçı konvoyınıñ kerüenä röxsät birmäde. Bötendön’ya sälamätlek saqlaw oyışması konvoy kerä almağaç, anıñ Ğazzäneñ kön’yağına kire qaytırğa mäcbür buluın xastaxanägä belderde. Xastaxanä yaralanğan keşelär sanı artu häm mediśina kiräk-yaraqları citmäw arqasında minimal’ quättä êşli.
Süriyä Keşe xoquqları çeltäre direktorı Fadl Abdulgani beldergänçä, Bäşşar Äsäd rejimı waqıtında 6 meñnän artıq ofiśernıñ suğış cinayät’lärendä qatnaşuı açıqlanğan. Ul Süriyäneñ yaña xökümäten ğayeple keşelärne cawapqa tartu öçen milli mäxkämä buldırırğa çaqırdı häm ğadellek täêmin itelmäsä qorbannarnıñ ğailäläre üç alırğa mömkin dip kisätte. Fadl Abdulgani Süriyädä bäysez xökemgä tartu sisteması buldıru öçen xalıqara yärdäm kiräklegen dä assızıqladı.
Törkiyä watandaşlar suğışı arqasında yabıq bulğan tulı wäqalätle ilçelegenä ilçe wazıyfaların waqıtlıça başqaruçı wäqalätle wäkil bilgeläp, Süriyä belän diplomatik mönäsäbätlärdä möhim adım yasadı. Törkiyäneñ xäzerge waqıtta Mavritaniya ilçese bulğan Burxan Köroğlu älege wazıyfağa bilgelände. Köroglu yaña wazıyfasında Törkiyäneñ Süriyädäge diplomatik êşlären başqaraçaq.