İzrailneñ Ğazzägä höcümnäre däwam itä. Ğazzäneñ tön’yağındağı Bäyt Laxiyädä yortsız qalğan ğailä sıyınğan öygä oyıştırılğan höcümdä 8 fälästinle ğomeren yuğalttı, 7 keşe yaralandı. Kübese xatın - qızlar häm balalar bulğan Battax ğailäseneñ öyendä Aşkar häm Süväyti ğailälärennän dä keşelär bar ide. CIA direktorı Bill Berns fälästinle “Xamas” törkeme belän İzrail arasında utnı tuqtatu häm totqınnar almaşu söyläşülärendäge soñğı wäzğıyät’ne qaraw öçen Qatar başqalası Doxada bulaçaq.
Fälästin qarşılıq kürsätü oyışması “Xamas” İzrail belän utnı tuqtatu häm totqınnar belän almaşu öçen Doxada uzğan soñğı söyläşülärne uñay häm citdi dip bäyäläde. “Xamas” İzrail yaña şartlar quyunı tuqtatsa, kileşü mömkin buluın äytte. İzrail massaküläm mäğ’lümat çaraları “Xamas” belän çitlätep söyläşülärdä kileşü täêmin itüdä alğarış buluın belderde.
Törkiyä ilbaşı urınbasarı Cäwdät Yılmaz İzrailneñ basıp alınğan Golan qalqulıqları ar’yağındağı ğamällären bik qurqınıç dip bäyäläde häm bu ğamällärneñ Süriyäneñ totrıqlılığına zarar birüen äytte. Yılmaz 2025 nçe yıl byudjetı utırışlarında Törkiyäneñ Süriyäneñ totrıqlılığın yaqlawdağı qatğıylığına basım yasadı häm çittän qatışularnı tänqıyt’läde.
“Ber ilneñ dä, ayıruça İzrailneñ ğazap çikkän häm ilen torğızırğa tırışqan keşelärgä zıyan kiterü xoquqı yuq. İzrailnen ğamälläre legal’ tügel”,- dide ilbaşı urınbasarı Cäwdät Yılmaz.
“Reuters” häm “AFP” agentlığınıñ isemsez çığanaqlarına nigezlängän xäbärenä qarağanda, Ukraina qurqınıçsızlıq köçläre Mäskäwdä maxsus operaśiyädä Rusiya general-polkovnigı İgor’ Kirillovnı üterde. Kiyev Kirillovnı suğış cinayät’çese dip sanıy häm Ukraina ğaskärlärenä qarşı tıyılğan ximik qoral qullanu boyırığı birüdä ğayepli ide. Kiyev Kirillovnı tulısınça legitim maqsat dip atadı. Rusiya qurqınıçsızlıq şurası räise urınbasarı Dmitriy Medvedev Ukraina citäkçelegen yaqında bu üterü öçen üç alu turında kisätte.
Rusiya parlamentı Äfganstannıñ “Taliban”ın tıyılğan terrorçı oyışmalar isemlegennän çığarırğa mömkinlek biräçäk qanun proyektın rasladı. Duma törkemnärne isemlektän çığarunıñ xoquqıy mexanizmın kürsätkän proyektnı qabul itte. Şulay itep kiläçäktä “Taliban” turında qarar qabul itü öçen mömkinlek tudı. Proyekt Federaśiya şurasına cibäreläçäk häm raslanğan oçraqta däwlät başlığı Vladimir Putinğa imzalaw öçen täq’dim iteläçäk.