AQŞ ilbaşı Donal’d Tramp düşämbe könne İzrail-Fälästin konfliktına ike däwlätle çişeleşne yaqlawnı kire qağıp, xäzerge östenlegeneñ Ğazzäne yañadan tözü buluın belderde.

Mısır ilbaşı Abdülfättax äs-Sisineñ ike däwlätle çişeleş häm bäysez Fälästin däwläte çaqıruına qağılışlı sorawğa cawap birgändä Tramp Misırdan qaytqanda jurnalistlarğa bolay dide:
“Min bötenläy başqa närsä turında söyläşäm. Bez Ğazzäne yañadan tözü turında söyläşäbez. Ber däwlät yäisä ike däwlät turında söylämim”.

Düşämbe könne Tramp belän Sisi Misırnıñ Şarm äş-Şäyex kurort şähärendä Törkiyä, Mısır häm Qatar garantlığında Ğazzädä utnı tuqtatu kileşüenä qul quyu öçen 20dän artıq dön’ya liderın cıydı.

“Bik küp keşe ber däwlätle çişeleşne yaqlıy. Ä qayberläre ike däwlätle çişeleşne. Küräçäkbez. Min bu xaqta älegä fiker beldermädem”,– digän Tramp Ğazzäneñ kiläçäge belän bäyle plannar turında illär belän koordinaśiyäle räweştä êşläyäçägen dä östäde.

Tramp, çärşämbe könne yasağan belderüendä, İzrail belän “Xamas”nıñ 29 sentyabr’dä täq’dim itelgän 20 maddäle planınıñ berençe êtabınıñ qabul itüen citkerde.

Bu plan Ğazzädä utnı tuqtatu, anda totılğan barlıq İzrail totqınnarın yaqınça 2 meñ fälästinle totqın belän almaşu häm İzrail ğäskärläreneñ Fälästin cirlärennän äkrenläp çigenergä tiyeşlegen küzdä tota.

Trampnıñ Ğazzädäge suğışnı tuqtatu öçen äzerlägän planınıñ berençe êtabı İzrailneñ ike yıllıq suğışın tuqtatunı maqsat itep, comğa könne ğamälgä kergän ide.

Plannıñ ikençe êtabı Ğazzädä yaña idarä mexanizmı buldıru, fälästinlelär belän ğaräp häm möselman illärdän kilgän ğäskärilär qatnaşında iminlek köçen oyıştıru häm “Xamas”nı qoralsızlandırunı küzdä tota.

2023 nçe yılnıñ oktyabrennän birle İzrail höcümnäre kübese xatın-qızlar häm balalar bulğan 67 meñ 800dän artıq fälästinleneñ ğomeren özde häm töbäkne zur däräcädä yäşi almaslıq xälgä kiterde.