AQŞ däwlät särqatibe Marko Rubio AQŞ İlbaşı Donald Trampnıñ İran belän bäyle mäs’älälärne söyläşülär yulı belän çişüne östen küräçägen äytte. Şimbä könne “Bloomberg” agentlığına birgän intervyusında ul: “İlbaşı üzeneñ niyäteneñ İran belän kileşü tözü ikänen belderde. Monı êşläw bik qıyın, läkin ul tırışayaçaq. Häm xäzerge waqıtta barıbız da şunıñ öçen êşlibez,” — dide.
Rubio, däwlätlärneñ üzara bäyläneştä bulırğa tiyeşlegen assızıqlap, bolay di: “Min härkem belän söyläşergä äzer bulğan ilbaşı qulı astında êşlim. Şuña hiç şiklänmim: ägär Ayätulla (Ali Xamaney) irtägä İlbaşı Tramp belän oçraşırğa telägen beldersä, ilbaşı anıñ belän oçraşaçaq. Monıñ säbäbe Ayätulla belän ber ük fikerdä buluında tügel, ä dönyadağı problema-mäs’älälärne çişü yulı şul dip uylawı”.
Yaqın Könçığışqa ikençe AQŞ avia-yörtüçe korabın urnaştıru turındağı sorawğa cawap itep, Rubio İrannıñ atom-töş qoralına iyä buluına “berqayçan röxsät birelmäyäçägen” äytte häm bu xälne AQŞ, Awrupa, töbäk häm global’ iminlek öçen qurqınıç dip atadı.
Rubio: “Töbäktä köçlärebezneñ buluın, älbättä, telibez, çönki İran AQŞnıñ töbäktäge xärbi qatnaşuına qarşı cawap qaytaru telägen häm mömkinlegen kürsätte,” — dide häm Vaşingtonnıñ töbäktäge ittifaqları arqasında xärbi bazaları buluın iskä töşerde.
Rubio AQŞnıñ “İrannıñ xata yasawın häm tağın da zurraq waqıyğa kiterep çığaruın buldırmas öçen töbäktä citärlek köçkä” iyä bulırğa tiyeşlegen citkerde.
