İran, sişämbe könne, üz cirlärenä qarşı AQŞ häm İzrail tarafınnan qabatlanğan höcüm bulğan oçraqta, cawaplarınıñ berse - urannı 90 protsentqa qadär bayıtu buluı mömkinlege turında kisätü belän çıqtı.

90 protsentlı bayıtu däräcäse qoral yasaw öçen yaraqlı dip qabul itelä.

İran parlamentınıñ tışqı säyäsät häm milli qurqınıçsızlıq komitetı süzçese İbrahim Rezayi “X” platformasında yasağan yullamasında: "Monı parlamentta küzdän kiçeräçäkbez", – dip belderde.

Rezayineñ bu süzläre, 28nçe fevraldä AQŞ häm İzrailneñ İranğa qarşı höcümnär başlap, töbäktä kiyerenkelek artqan waqıtqa turı kilde. Höcümnär Tährannıñ İzrailgä häm Farsı qultığında Amerika xärbi obyektları bulğan illärgä cawap qaytaruına häm Ormuz buğazınıñ yabıluına kiterde.

Paqıstannıñ aradaşçılığı belän 8nçe apreldä utnı tuqtatu kileşüe üz köçenä kerde, läkin İslamabadtağı söyläşülär daimi kileşü belän näticälänmäde. Utnı tuqtatu soñraq AQŞ ilbaşı Donald Tramp tarafınnan bernindi waqıt çikläwsez ozaytıldı.

Yäkşämbe könne İran suğışnı tämamlawğa yünältelgän AQŞ täqdimenä cawabın Paqıstanga cibärde, läkin Tramp monı "tulısınça qabul itelmäslek" dip atadı.