İlneñ afätlärne idarä itü agentlığı xäbär itkänçä, İndoneziyädä İslam internat mäktäbe binası cimerelü näticäsendä wafat bulğan uquçılar sanı 16dan 36ğa kütärelgän.

 Agentlıq beldergänçä, 13 yäş’tän 19 yäş’kä qadär bulğan, kübese ir-yegetlärdän torğan 27 uquçı haman da cimerelgän bina astında yuğalğan dip isäplänä häm alarnıñ mäyetlären êzläw êşläre cidençe köndä dä däwam itä.

Cimerelgän binanı qazıp alu öçen krannar qullanıla, êzläw-qotqaru êşläreneñ yaqınça 60%ı tögällängän.

Barlıq çistartu häm êzläw êşlären düşämbe könenä qadär tämamlaw kötelä.

Könçığış Yava provinśiyäsendäge Sidoarjo qasabasında urnaşqan “Al Khoziny” mäktäbe ütkän düşämbe könne binanıñ nigeze öske qatlarda däwam itüçe tözeleş êşlären kütärä almaw säbäple öylä namazı waqıtında yözlägän uquçı östenä cimerelde.

Yäşäw bilgeläre tabılmadı

Qotqaru törkemnäre êlek alıp barılğan êzläw waqıtında yäşäw bilgeläre tapmamağannan soñ, comğa könne awır texnika qullanu öçen ğailälärdän röxsät alınğan.

Qotqaruçılar binanıñ cimerekläre arasında tunnel’lär qazıp, balalarnıñ isemnären äytep häm xäräkät sizüçe sensorlar qullanıp êzlädelär, läkin yäşäw bilgeläre tapmadılar.

 “Al Xoziny”  - İslam internat mäktäbe.

Dön’yada iñ küp möselman xalıqqa iyä bulğan däwlät İndoneziyädä Din êşläre ministrlığı mäğl’ümatlarına qarağanda, yaqınça 42 meñ İslam mäktäbe êşli häm alarda 7 million uquçı belem ala.