Törkiyä tışqı êşlär ministrı Xaqan Fidan İran tışqı êşlär ministrı Abbas Arakçiğa Törkiyä hawa kiñlegen bozunı qabul itep bulmawın citkerde.
Diplomatik çığanaqlar söyläşüneñ töp teması soñğı waqıtta Törkiyä hawa kiñlegen bozğan raketa höcüme buldı, bu Änkaranıñ Tährannan añlatma häm garantiya taläp itüenä kiterde dip belderde.
Tışqı êşlär ministrlığı çığanaqları beldergänçä, sişämbe könne uzğan telefon söyläşüendä Fidan Arakçinı Törkiyäneñ üz möstäqıyl’legen saqlaw öçen kiräkle barlıq çaralarnı kürüne däwam itäçäge turında kisätte.
Ministr Fidan şulay uq barlıq yaqlarnıñ da töbäk iminlegen qaqşata häm tınıç xalıq öçen qurqınıç tudıra ala torğan ğamällärdän tıyılıp torırğa tiyeşlegen assızıqladı.
Arakçi Törkiyä hawa kiñlegenä yünältelgän raketalarnıñ İrannan kilmäwen häm bu mäs’älä belän bäyle kiñ qırlı tikşerü alıp baruların belderde.
Patriot hawa saqlanu sistemaları
Törkiyä sişämbe könne, töbäktä kiyerenkelek däwam itkändä ilneñ hawa kiñlegen saqlawğa yärdäm itü öçen, NATO belän koordinaśiyälängän tırışlıqlar qısasında, Törkiyäneñ könçığışında Patriot hava saqlanu sistemasın operativ xälgä kiterü öçen äzerlänüen iğ’lan itte.
Törkiyä milli saqlanu ministrlığı belderüendä bolay diyelä:
“Törkiyä Qorallı Köçläre ilebez häm watandaşlarıbız iminlegen täêmin itügä tulısınça birelgän.Töbägebezdäge soñğı waqıyğalarnı isäpkä alıp çiklärebezneñ häm hawa kiñlekläreneñ iminlegen täêmin itü öçen kiräkle çaralar kürelä, şulay uq NATO häm berlektäşlärebez belän kiñäşmälär ütkärelä”.
Belderüdä şulay uq milli iminlek çaraları belän bergä ittifaqnıñ töbäk saqlanu poziśiyäsen nığıtuı bilgeläp ütelä.
“Bez milli däräcädä kürgän çaralardan tış, NATO tarafınnan hawa häm raketa saqlanu çaraları arttırıldı” diyelde.
NATO hawa saqlanu sistemaları düşämbe könne İrannan cibärelgän häm Törkiyägä taba yünälgän tağın ber raketanı totqarladı. Bu — soñğı atnada İran raketalarınıñ Törkiyä hawa kiñlegenä kerüe belän bäyle ikençe waqıyğa.
