İminlek çığanaqlarınnan alınğan mäğ’lümatqa qarağanda, Törkiyä milli küzläw oyışması çik ar’yağında “DEAŞ” terror oyışmasına operaśiya oyıştırdı.

 Milli küzläw oyışmasınıñ  Süriyädä Süriyä küzläw xezmäte belän koordinaśiyäle räweştä ütkärgän operaśiyäse näticäsendä İnterpol tarafınnan êzlängän 10 “DEAŞ” äğ’zası totqarlandı häm Törkiyägä kiterelde.

 Küzläw oyışması  häm iminlek ğomum mödirlegeneñ terroçılıqqa qarşı köräş bülegeneñ urtaq tırışlıqları näticäsendä 10 “DEAŞ” äğ’zasınıñ 9ı saq astına alındı, berseneñ isä qulğa alu waqıtı ozaytıldı.

Küzläw oyışmasınıñ küzläw êşçänlege näticäsendä Törkiyädän Süriyägä ütep “DEAŞ” terror oyışmasına quşılğan çığışı belän törek bulğan şäxeslär açıqlandı.

 Tikşerülär näticäsendä älege keşelärneñ “DEAŞ” êçendä aktiv êşçänlek alıp baruı bilgele buldı. Monnan tış, alarnıñ êlek Törkiyädä başqarılğan küp sandağı terror höcümnärendä qatnaşuı da açıqlandı.

Totqarlanğan 10 “DEAŞ” terrorçısınıñ berseneñ 109 keşeneñ ğomeren özgän Änkara timer yul vokzalındağı höcümne oyıştıruçılar  belän bäyläneşe açıqlandı.

Milli küzläw oyışması älege 10 “DEAŞ” äğ’zasınıñ Süriyädä buluın açıqlagaç, Süriyä küzläw xezmäte belän êlemtägä kerde.

Bu koordinaśiyädän soñ alıp barılğan êşçänlek näticäsendä şäxeslärneñ urınnarı bilgelände. Terrorçılarnıñ böten xäräkätläre küzätelde.

Operaśiya barışında 10 “DEAŞ” terrorçısı Süriyädä totqarlandı häm Törkiyägä kiterelde.

 Küzläw oyışması  häm iminlek ğomum mödirlegeneñ terroçılıqqa qarşı köräş bülegeneñ urtaq tırışlıqları näticäsendä 9 “DEAŞ” äğ’zası soraw aludan soñ mäxkämä qararı belän saq astına alındı, berseneñ isä qulğa alu waqıtı ozaytıldı.

“DEAŞ” äğ’zası bulğan 10 terrorçı poliśiyägä birgän añlatmalarında:

“DEAŞ” tarafınnan birelgän höcüm kürsätmäläre,

“DEAŞ” êçendä alğan qorallı häm dini äzerlekläre,

“DEAŞ” isemennän başqarğan propaganda êşçänlege turında mäğ’lümat birde.

“DEAŞ” êçendä êşçänlek alıp barğan häm İnterpol tarafınnan  êzlängän 10 şäxes tübändägelär:

• Ali Bora

• Ömer Deniz Dündar

• Hüseyin Peri

• Kadir Gözükara

• Abdullah Çobanoğlu

• Hakkı Yüksek

• Kadir Demir

• Çekdar Yılmaz

• Murat Özdemir

• İshak Günci.