AQŞ ilbaşı Donald Tramp yakşämbe könne Äfganstan belän Paqıstan arasındağı soñğı kiyerenkelekne çişärgä süz birde häm suğışlarnı beterü säläte belän maqtandı.

Tramp jurnalistlarğa “Air Force One” oçqıçında İzrailgä barışlıy bolay dide: “Bu min çişkän sigezençe suğış bulaçaq. Xäzerge waqıtta Paqıstan belän Afganstan arasında suğış bara. Min qaytqançı kötärgä kiräk. Älegä başqa suğışnı tuqtatırğa tırışam. Suğışlarnı beterü sälätem bar, tınıçlıq urnaştıra alam. Bu ğorurlıq birä. Millionlağan tormışnı qotqarıp qaldım, millionlağan keşene.”

Paqıstan häm Äfganstan arasında çıqqan qanlı bäreleşlärdä distälägän ğäskäri ülde. İke yaq ta bu mäğlümatnı döres dip belderde.

Düşämbe könne Trampnıñ İzraildä izraille äsirlärneñ ğailäläre belän oçraşuı häm İzrail parlamentı Knessetta çığış yasawı kötelä.

Annarı ul Misırnıñ Şarm-äş-Şäyx şähärenä yul totaçaq häm dönya liderları belän sammitta qatnaşaçaq.

Qahirä citäkçelegenä kürä Tramp häm Misır ilbaşı Ğabdelfättah es-Sisi citäkläyäçäk bu sammitnıñ maqsatı - Ğazzä suğışın tuqtatu, Yaqın Könçığışta tınıçlıq häm totrıqlılıq urnaştıru, töbäk iminlege häm totrıqlılığı öçen yaña çor başlatu.