AQŞ mediasında urın alğan xäbärlärgä qarağanda, AQŞ Süriyädän soñğı aylarda êtaplı räweştä başqarğan çığarularınıñ däwamı bularaq, bu ildä qalğan yaqınça 1 000 keşelek xärbi berämlegen dä çığarırğa qarar birde.
AQŞ räsmi zatlarınıñ açıqlawlarına nigezlänüçe “Wall Street Journal” basması monıñ ike ay êçendä tämamlanuı kötelüen belderde.
Xäbärdä Vaşingtonnıñ, “YPG” terrorçı oyışmasınıñ tarqaluın säbäp itep kürsätep, Süriyädä AQŞ xärbiläreneñ monnan arı kiräk bulmawı turındağı näticägä kilüe äytelde.
AQŞ armiyäseneñ Süriyä, Yordaniya häm Ğıyraq çiklärenä yaqın möhim xärbi punkt bulğan Äl-Tanf garnizonınnan häm Süriyäneñ tönyaq-könçığışındağı Äl-Şaddadi bazasınnan çığunı bu ay başında uq tögälläwe citkerelde.
Xäbärdä, şul uq waqıtta, bu çığunıñ atom-töş söyläşüläreneñ uñışsız tämamlanuı oçrağında İranğa qarşı höcüm yasawnı maqsat itkän AQŞ diñgez häm hawa köçläreneñ Yaqın Könçığıştağı xäzerge urnaşuı belän bäyläneşe bulmawına basım yasaldı.
“Wall Street Journal” xäbärendä İrannıñ da, AQŞnıñ hawa höcümnärenä cawap bularaq, töbäktäge Amerika köçlären nişanğa alaçağı turında kisätüe belderelde.
AQŞnıñ yuğarı däräcäle räsmi zatına tayanğan xäbärdä, çığunıñ Süriyä xökümäteneñ terrorçılıqqa qarşı köräşne üz östenä aluı belän ber waqıtta başqarıluı häm AQŞ köçläreneñ “DEAŞ” yanawlarına qarşı haman da cawap birä alacağı äytelde.
Süriyä xökümäte, AQŞnıñ yaqınça 10 yıldan soñ ildän çığuınnan soñ, Ğıyraq häm Yordaniya çikläre kiseleşendäge strategik Äl-Tanf bazasınıñ kontrolen üz qulına aldı.
AQŞ 2017 häm 2018 yıllarda kiñäytelgän Äl-Tanf bazasın häm monda urnaştırılğan küzätü şarların Yordaniya çige belän Färat yılğası arasındağı yözlärçä çaqrımlıq mäydanda İran yaqlı törkemnärneñ häm “DEAŞ”nıñ xärbi xäräkätlären küzätü öçen qullanğan ide.
