İran tışqı êşlär ministrı Yaqın Könçığış konfliktınıñ berençe könendä İrandagı mäktäpkä bulğan ülemle höcümne AQŞnıñ "isäplängän" höcüme dip atadı.
Abbas Araqçi comğa könne yasağan belderüendä 28 fevral’dä Minabtagı başlanğıç mäktäpkä "isäplängän, êtaplı höcüm" waqıtında 175tän artıq uquçı häm uqıtuçınıñ salqın qanlılıq belän üterelüen belderde.
Berläşkän Millätlär Oyışmasınıñ Keşe xoquqları şurasınıñ höcümgä bäyle aşığıç utırışına cıbärelgän video-möräcäğattä Araqçi monı "suğış cinayäte häm keşelekkä qarşı cinayät, barısı tarafınnan da bersüzsez xökem itelergä tiyeşle häm cinayätçelär cawaplılıqqa tartılırğa tieşle cinayät" dip atadı.
BMOnıñ Keşe xoquqları buyınça yuqarı komissarı Folker Türk şurada yasağan belderüendä bu bombaşı höcümneñ êçke qurqu" tudıruın häm ğadellek kiräklegen assızıqladı.
Höcümdä ike balasın yuğaltqan Möxäddisä Fälähät, şulay uq, şurağa videoêlemtä aşa möräcäğät itte.
Jenevadagı diplomatlarnı "bu facıyğane onıtmasqa" çaqırıp, Fälähät bolay dip östäde: "Bernindi ana da 'Balagız kire qaytmayacaq' digän süzlärne işetergä äzer tügel".
AQŞ häm İzrail wäkilläre şuradan çıqtılar häm söyläşülärdä çığış yasamadılar.
