Ben-Gvir üzeneñ sośial media akkauntında İzrail törmäsendäge Fälästin xatın-qız totqınnarı bulğan kamerağa kilep kerüen töşergän video yazmanı urtaqlaştı.

Video yazmadan kürengänçä ber xatın-qız törmä şartlarınıñ bik naçar buluın häm xätta töp şäxsi ixtıyaclardan da mäxrüm itelülären äytep: “Bez öç kön yuına almadıq. Kiyemnärebez çista tügel, şartlar bik naçar,” – dide.

Annarı Ben-Gvir anı mısqıllap: “Törmadäge yaxşı könnäregez ütte. Xäzer xäl şundıy. Monnan min cawaplı häm moña şat,” – dide.

Xatın-qız şartlarnı yaxşırtunı sorağaç Ben-Gvir: “Min ni öçen sezgä yärdäm itärgä tiyeş soñ?” – dip cawap birä.

"Bu qunaqxanä tügel”

Ben-Gvir Milli qurqınıçsızlıq ministrı wazifasına kereşkännän birle İzrail törmälärendä Fälästin totqınnarına qarata keşe xoquqların bozular arttı.

İzrail ministrı moña qadär Fälästin totqınnarı bulğan İzrail törmälärenä berniçä tapqır barıp, alarnı mısqıllağan häm şartlarnı yaxşırtırğa sorağan xatın-qızğa: “Bu qunaqxanä tügel,” – dip äytkän ide.

Fälästin häm xalıqara keşe xoquqları oyışmaları mäğlümatları buyınça İzrail törmälärendä 9500dän artıq fälästinle totıla. Alarnıñ 350ese – balalar, 94e – xatın-qızlar.

Distälägän fälästinle İzrail törmälärendä açlıq, intekterü häm mediśina yärdäme kürsätelmäw kebek awır şartlarda naçar möğamälä näticäsendä ülgän.