Räsmi mäğ’lümat çaraları xäbär itüençä, basıp alınğan Yordannıñ könbatış üzänlegendä izraille qanunsız kilep urnaşuçılar häm İzrail köçläre tarafınnan oyıştırılğan höcümdä ike yäş’ fälästinle üterelgän.
“WAFA” agentlığı düşämbe xäbär itkänçä, 19 yäş’lek Äxmät Rubxi äl-Atraşqa Äl-Xälil şähäreneñ tön’yaq kerü urınında qanunsız kilep urnaşqan izraille ata.
Waqıyğa şahitları agentlıqqa beldergänçä, İzrail xärbiläre Qızıl Xaç sälamätlek saqlaw törkemnäreneñ äl-Atraş yanına kilüenä kirtä quyğan häm yäş’ yeget qan yuğaltudan wafat bulğan.
Başqa ber waqıyğada, Fälästin sälamätlek saqlaw ministrlığı beldergänçä, 17 yäş’lek Cämil Atıf Xannani yäkşämbe kiçendä Nablusnıñ könçığışındağı Beyt Furik qasabasınd İzrail köçläre oyıştırğan basqın waqıtında awır yaralana häm anıñ ğomere özelä.
Fälästin “Qızılay”ı Xannanineñ kükrägenä çın pulya belän atuların, anıñ Rafidia däwlät xastaxanäsenä cibärelüen, anda wafat buluın açıqladı.
Fälästin çığanaqları beldergänçä, 2023 yılnıñ oktyabrennän birle basıp alınğan Yordannıñ könbatış üzänlegendä İzrail höcümnäre köçäyep, 1 063tän artıq fälästinleneñ ülemenä häm 10 300 keşeneñ yaralanuına kitergän.
BMO Xalıqara mäxkämäse uzğan yılnıñ iyül’ ayında çığarğan tarixi qararında İzrailneñ Fälästin cirlärendäge basıp aluın qanunsız dip iğ’lan itkän häm Yordannıñ könbatış üzänlege belän Könçığış Qodüstäge barlıq kilep urnaşuçılarnı küçerergä çaqırğan ide.
