Yaponiyä räsmiläre sişämbe könne yasağan belderüdä ildä küzätelgän ğadättän tış köçle qar yawunıñ sonğı ike atnada 30 keşeneñ ülemenä säbäpçe buluın citkerde. Ülüçelärneñ berse — öye qarşında öç metrlıq qar öyeme astında qalğan 91 yaşlek xatın-qız.
Üzäk xökümät iñ qatı zıyan kürgän Aomori töbägendäge keşelärgä yärdäm itü öçen ğaskärilärne cibärde. Yıraq töbäklärdä qar biyeklege 4,5 metrgä qädär citte.
Xökümät räise Sanae Takaiçi sişämbe irtän ministrlar belän maxsus kiñäşmä ütkärde häm ülem oçraqların, bäxetsez xällärne buldırmaw öçen quldan kilgänneñ bärısın da êşlärgä boyırdı.
Suıq hawa massası sonğı atnalarda Yaponiya diñgeze buyında köçle qar yawuğa kiterde. Qayber töbäklärdä ğadättägedän ike tapqır kübräk qar yawdı.
Yañğın häm afätlär belän idarä itü agentlığı mäğlümatlarına kürä, 20nçe häm 21nçe ğıyñvarda köçle qar yawu arqasında 30 keşe hälaq bulğan.
Alar arasında Aomorineñ Acigasava şähärendäge öye yanında qar astında gäwdäse tabılğan 91 yaşlek Kina Cin da bar. Cirle politsiya xezmätkäre “AFP” agentlığına beldergänçä, tübädän qar töşkän häm xatın-qıznıñ ülem säbäbe tını qısılıp sulışsız qalu bulğan. Gäwdä yanında qar köräge tabılğan.
Räsmi zat: 'Hawa cılına başlağaç, cıyılğan qar êri häm töşä. Bu qar küläme häm temperaturasına bäyle. Tübä yannarında yörü qurqınıç,' — dip kisätte.
Aomori gubernatorı Seiçiro Miyaşita düşämbe köne Yaponiya armiyasennän afät urınnarında yärdäm sorawın äytte.
Miyaşita monı yalgız yaşäwçe häm qardan çistartuda bulışuğa moxtaç qartlarğa yärdäm itü öçen sorağan.
Gubernator Aomori şähärendä 1,8 metrlıq qar divarları barlıqqa kilüen belderep, yullarda häm öylärdä qardan çistartunıñ citärlek bulmawın äytte. Ul matbuğat konferentsiyäsendä: “Tübälärdän qar töşü yäki binalar işelü säbäple ülem qurqınıçı bar”, — dip kistätte.
