İran tışqı êşlär ministrı Abbas Arakçi, Livandağı utnı tuqtatu kileşüe nigezendä barlıq säwdä qorablarınıñ Ormuz buğazı aşa ütä alaçağın belderde.
Abbas Arakçi comga könne “X” platformasında yasağan belderüendä: «Livandağı utnı tuqtatu belän parallel’ räweştä, İran Portlar häm diñgezçelek oyışması tarafınnan iğlan itelgän koordinaśiyalängän marşrut aşa barlıq säwdä qorabları utnı tuqtatunıñ qalgan waqıtı däwamında Ormuz buğazınnan ütä alaçaq dip iğlan itelde», — dide.
AQŞ ilbaşı Donald Tramp İrannıñ bu belderüen xupladı. Tramp comğa könne «Truth Social» platformasında «Räxmät!» dip yazdı häm İrannıñ bu tar su yulınıñ «Tulısınça açıq häm ütü öçen äzer» buluın citkerüen bilgeläp ütte.
Läkin Tramp Tähran citäkçelege belän tınıçlıq kileşüe tözelgängä qädär, AQŞnıñ İran portlarına qarata qullanğan diñgez qamalışınıñ däwam itäçägen äytte.
AQŞ-İsrailneñ İranğa qarşı höjümläre 28 fevral’dä başlanğannan birle buğazdan ütüçe korablar sanı bik az; köndälek ütülär, yal könnärendäge qısqa waqıtlı artunı isäpkä almaganda, küpçelek oçraqta ber urınlı sannarda qaldı.
AQŞ xärbi-diñgez köçläre iğlan itkän soñğı qağidä buyınça, qorab iyälärenä Farsı qultığınnan neft’ häm başqa tovarlar çığaru öçen İrannan da, Amerika räsmilärennän dä röxsät alırğa kiräk. Bu xäl yök taşu xäräkätendäge bilgesezlekne tağın da arttıra.
Ütkän atnada İrannıqı bulmağan êşkärtelmägän neft’ taşuçı öç super tanker buğazdan çığıp kitä alsa da, qamalış başlanğanğa qädär ük, soñğı cide atna êçendä buğazdan bik az tanker uzdı.
Paqıstan bayraqlı «Şalamar» tankerı başta yäkşämbe könne Farsı qultığına kerergä tırıştı, ämma AQŞ-İran tınıçlıq söyläşüläre uñışsız tämanlanğannan soñ kire borıldı. Tanker soñraq buğaz aşa ütep, Das utrawına yünälde häm anda êşkärtelmägän neft’ töyägännän soñ, pänceşämbe könne könçığışqa taba yulğa çıqtı.
