İke Süriyä xärbiye Xäleb töbägeneñ Däir Hafer cirlegendä “SDG” terrorçı törkeme höcüme näticäsendä häläk bulğan. Bu xaqta Süriyä ğäräp xäbär agentlığı SANA citkerä.
Süriyä saqlanu ministrlığınıñ Matbuğat häm kommunikatsiyä departamentı belderüendä äytelgänçä, “SDG” soñgı waqıtta Xäleb töbäge awılların häm şähärlären minomyet häm raketalar belän utqa totqan. Anda xärbi xezmätkärlär dä, tınıç xalıq ta zıyan kürgän.
“SDG” oyışmasın “YPG” terrorçı törkeme citäkli, ul “PKK” terrorçı oyışmasınıñ Süriyä bülege bulıp tora.
Törkiyä, AQŞ häm Awrupa Berlege “PKK”nı terrorçı oyışması dip tanıy.
Bu höcüm -Süriyäneñ tönyaq öleşendä, xärbi häm tınıç xalıqqa qarşı başqarılğan höcümnärneñ soñğısı bulıp tora, dip belderä Dimäşq.
Yañadan köçäygän kiyerenkelek Süriyädä yaqınça 25 yıl xakimiyättä bulğan Bäşşar äl-Äsadnıñ 2024 yılda Rusiyägä qaçıp kitüennän soñ ildä başlanğan säyäsi üzgäreşlär protsessında bara.
10 martta Süriyä ilbaşı idaräse “SDG”nı däwlät oyışmalarına integratsiyäläw turında kileşü tözelüen citkerde.
Belderüdä Süriyäneñ territorial bötenlege assızıqlandı häm "separatist köçlär" kire qağıldı, läkin Däir Haferdağı kebek höcümnär ildä totrıqlılıq urnaştıru omtılışlarına zıyan kiterä.
Saqlanu ministrlığı üz köçläreneñ “SDG”nıñ ğamällärenä "qatğıy cawap birüen" belderde häm yaña höcümnär töbäktäge totrıqlılıq tırışlıqlarına zıyan kiteräçäk dip kisätte.
Şulay uq, ministrlıq xalıqara köçlärne “PKK” belän bäyle törkemnärgä yärdäm kürsätmäskä çaqırdı.
Ministrlıq zıyan kürgän töbäklärdä tınıç xalıqnı yaqlaw burıçına tuğrı buluın qabatladı häm “SDG”nı "ildäge nığımağan iminlek wäzğıyätennän faydalanıp, separatist maqsatların tormışqa aşıru"da ğayepläde.
