Törkiyä yäkşämbe könne İzrailneñ yaw astındağı Yordannıñ könbatış üzänlegendä anneksiya turındağı yaña qararın qırıs räweştä tänqitläde häm monı xalıqara xoquqnı bozu dip atadı.

İzrail xökümäte yäkşämbe könne irtän, 1967 yılda töbäkne yawlağannan birle berençe märtäbä yaw astındağı Yordannıñ könbatış üzänlegendäge zur mäydannarnı "däwlät milke" bularaq terkäw täqdimen rasladı.

Törkiyä tışqı êşlär ministrlığı yasağan belderüendä, bu adım maqsatında İzrailneñ Yordannıñ könbatış üzänlegendä xäkimiyät urnaştıru häm yaña bistälär tözü êşçänlegen kiñäytü buluın citkerde.

Belderüdä: "Fälästin xalqın üz cirlännan mäcbüri räweştä sörüne häm İzrailneñ xoquqsız anneksiya adımnarın tizlätüne maqsat itep quyğan bu çaralar xalıqara xoquqnı açıqtan-açıq bozu bulıp tora häm alarnıñ bernindi yuridik köçe yuq," — diyelde.

Ministrlık: "İzrailneñ yaw astındağı Fälästin cirlärendä bernindi xäkimiyäte yuq," — dip belderde häm Netanyaxu xökümäte alıp barğan êkspansionist säyäsätlärneñ tınıçlıq urnaştıru tırışlıqlarına zarar birüen häm ike däwlätle çişeleş mömkinleklärenä zıyan kiterüen assızıqladı.

Törkiyä xalıqara cämğäğatçelekne İzrailneñ cirlektäge omtılışlarına qarşı täwäkkäl totış kürsätergä çaqırdı.

Ministrlık Törkiyäneñ 1967 yılğı çiklär nigezendä, başqalası Könçığış Qodüs bulğan, geografik bötenlekkä iyä, bäysez häm möstäqil Fälästin däwläteneñ qorıluına yünälgän tırışlıqlarnı yaqlawnı däwam itäçägen äytte.