AQŞtağı “Axios” xäbär agentlığı şimbä könne beldergänçä, AQŞ İlbaşı Donald Tramp häm İzrail xökümäte räise Binyamin Netanyaxu, bigräk tä, İrannıñ Qıtayğa neft’ satuın nişanğa alıp, Tähranğa qarşı iqtisadi basımnı arttıru turında kileşügä ireşte.

Älege mäs’älä buyınça mäğlümatı bulğan ike Amerika wäqalätleseneñ süzlärenä tayanğan xäbärdä, kileşüneñ Tramp häm Netanyaxunıñ çärşämbe köne Aq Yortta uzğan oçraşuı waqıtında tözelüe äytelä.

AQŞnıñ yuğarı däräcäle ber räsmiye: “Mäsälän, İran nefteneñ Qıtayğa satıluı mäs’äläsendä, tulı köçkä häm maksimal’ basım yasaw turında kileştek,” — dip belderde.

Xäbärdä äytelgänçä, bu maqsatqa niçek ireşü mäs’äläsendä qarşılıqlı fikerlär dä bar ide. Netanyaxu Trampqa İran belän ışanıçlı kileşü tözü mömkin tügellegen häm anı bozaçağın äytsä, Tramp kileşüneñ mömkin ikänenä ışanuın belderde.

AQŞ räsmiye süzlärençä, Tramp: “Mömkinme-tügelme - kürerbez, şans birep qarap qarıyq,” — digän.

Vaşington, atom-töş söyläşüläre belän ber ük waqıtta, İranğa qarşı maksimal’ basım kampaniyäsen däwam itteräçäk. Diplomatik tırışlıqlar uñışsızlıqqa oçrasa, höcüm itü variantın saqlap qalu öçen Yaqın Könçığışta xärbi köçlärne arttıru êşläre dä bara.

İran neft’ êksportınıñ 80 protsenttan artığı Qıtayğa kitü säbäple, älege ildän satıp alularınıñ kimüe Tähranğa bulğan iqtisadi basımnı kisken arttıra ala. Bu xäl İrannıñ atom-töş programmasında kübräk yul quyuı ixtimalın tudıra.

Şulay uq, Tramp küptän tügel qul quyğan ilbaşı qararı AQŞqa İranğa iqtisadi basımnı köçäytergä mömkinlek birä. Anda däwlät häm säwdä ministrlıqlarına Tähran belän säwdä itüçe illärgä 25 protsentqa qädär tamğaxanä salımnarı täqdim itü xoquqı birelä.