AQŞ ilbaşı Donald Tramp üz ile belän İzrailneñ İranğa qarşı suğışınıñ bötenläy diyärlek betüen äytte.

Çärşämbe könne basılıp çıgaçaq interv’yuda suğış betteme digän sorawğa Tramp “Fox Business” alıp baruçısı Mariya Bartiromoğa bolay dip cawap birde: “Minemçä, ul bette diyärlek. Yäğni, bik yaqında betäçäk”.

İnterv’yudan video özek “X” platformasında urtaqlaşıldı.

Tramp bolay dip östäde: “Qarağız, ägär min xäzer kire çigensäm, alarğa bu ilne torğızu öçen 20 yıl kiräk bulır ide häm bezneñ äle êşebez betmäde. Närsä bulaçağın kürerbez. Minemçä, alar kileşü tözergä teli, çınnan da bik telilär”.

Êlegräk Bartiromo “İnstagram”da urtaqlaşqan videosında interv’yu däwamında Trampnıñ İran suğışı turında daimi räweştä ütkän zamanda söyläwen, şuña kürä ul turıdan -turı “Betteme?” dip sorawın äytte. Bartiromo: “Ul bette” dide.

AQŞ häm İzrailneñ İranğa qarşı 28 fevral’dä başlanğan suğışın tuqtatu öçen atna azağında İslamabadta söyläşülär uzdı, läkin kileşügä ireşelmäde.

Yaňa söyläşülär turın oyıştırıu öçen tırışlıqlar däwam itä.

Tramp AQŞ belän İran arasında turıdan-turı söyläşülärneñ qabat başlanu mömkinlegenä optimizm belderde häm sişämbe könne bu söyläşülär ike kön êçendä Paqıstanda qabat başlanırğa mömkin dip citkerde.

Paqıstan 8 aprel’dä yaqlar arasında älegä qadär däwam itüçe ike atnalıq utnı tuqtatu täêmin itte.