Nyu-Yorknıñ yaña xakimiyät başlığı Zoxran Mamdani êşkä kereşkän berençe könendä üzennän aldağı êks-mêr Êrik Adams imzalağan häm İzrailgä yärdäm bularaq täqdim itelgän bäxäsle qararlarnı da üz êçenä alğan ber törkem başqarma boyırıqlarnı ğamäldän çığaruçı qararnamägä qul quydı.

Mamdani çığarğan başqarma boyırıqqa qarağanda, 2024nçe yılnıñ 26nçe sentyabrennän soñ imzalanğan häm 2025nçe yılnıñ 31nçe dekabrenä qadär ğamäldä bulğan barlıq direktivalar üz köçen yuğalta dip tanıldı. Annan da êlek çıqqan qararlarnıñ isä, açıq räweştä üzgärtelmäsä yäki kire qağılmasa, ğamäldä qalaçağı belderelde.

Pänceşämbe könne mêriyädäge ant itü tantanasınnan nibarı berniçä säğat uzğaç bu qararlarnı ğamälgä kertkän Mamdani, comğa könen yasağan belderüendä Adams däwerenä qarağan qararlarnı yuqqa çığaruın yaqladı.

Bu adım uzğan ayda qabul itelgän häm meriyä oyışmalarına İzrailne boykot itüne yäki investitsiyälären kire aluın tıyuçı qararnı da üz êçenä ala.

İyün ayında imzalanğan häm İzrailgä qarata qayber tänqıytne antisemitizm qısalarına kertkän başqa ber direktiva da ğamäldän çığarılğannar arasında urın aldı.

İzrail tışqı êşlär ministrlığı sotsial’ çeltärlär aşa yasağan belderüendä Mamdaninı antisemitizmnı köçäytüdä ğäyepläde. Nyu-York yähüdläre federatsiyäse şikelle qayber oyışmalar da bu qararğa qarşı çıqtı häm anıñ “antisemitizmğa qarşı möhim saqlanunı kire aluı” turındağı fikerlären belderde.

Şulay da, Mamdani êlekkege citäkçelek tarafınnan tözelgän häm antisemitizmğa qarşı köräşne maqsat itep quyğan meriyä bülegen yuqqa çığarmadı. Anıñ êşçänlegen däwam itäçäge belderelde.

Mamdani matbuğat konferentsiyäsendä: “Yähüd Nyu-Yorklılarnı saqlaw citäkçelegemneñ iñ möhim östenleklärennän berse bulaçaq”, — dide. Başqarma boyırıqlar turındağı qararınıñ, üz citäkçelegenä “Nyu-Yorklılar öçen yaña däwerne tormışqa aşıru maqsatı belän yaña bit” açuın belderde.