“Wall Street Journal” xäbärenä qarağanda, Amerika Quşma Ştatları Ukrainağa Rusiya ênergiya infrastrukturasına ozın radiuslı raketa höcümnäre yasaw öçen küzläw mäğ’lümatı biräçäk.
Xäbärdä Vaşingtonnıñ NATO berlektäşlären dä şundıy yärdäm kürsätergä öndäwe belderelde.
Kiñäytelgän küzläw mäğ’lümatı urtaqlaşu röxsäteneñ AQŞ ilbaşı Donal’d Trampnıñ sośial’ çeltärdä Ukraina Rusiya tarafınnan basıp alıngan barlıq cirlären kire alaçaq dip äytüennän az ğına êlek birelüe belderelä.
Tramp ütkän atnada Ukraina däwlät başlığı Volodimir Zelenskiy belän oçraşudan soñ “Truth Social” platformasında bolay digän ide:
"Suğışnıñ Rusiyädäge iq’tisadi qıyınlıqların kürgännän soñ, Awrupa Berlege yärdäme belän Ukraina barlıq cirlären kire alaçaq dip uylıym."
Awrupa Berlege Kiyevkä köçle yaqlaw kürsätergä süz birde
Awrupalı liderlar Ukraina belän saqlanu xezmättäşlegen arttırırğa süz birde häm Rusiyäneñ könnän - kön köçäygän höcümnäreneñ qıytğa öçen qurqınıç tudıruın assızıqladı.
Awrupa şurası başlığı Antonio Kosta 23–24 oktyabr’ könnärendä uzaçaq sammitnıñ qarar köne bulaçağın belderde.
Daniya prem’yer-ministrı Mette Frederiksen “Rusiya bezgä yanıy, qurqıta, bezne sınıy häm tuqtamayaçaq” dip belderde.
Awrupa komissiäse başlığı Ursula fon der Leyen, Awrupa saqlanuına investiśiyälärneñ arta başlawın belderep, 176 milliard dollar külämendäge Awrupa iminlek ğamäle programmasın ürnäk itep kürsätte.
Fon der Leyen şulay uq pilotsız oçu apparatlarına qarşı "dron divarı" çaqıruın yañartıp, "Härber Awrupa watandaşı häm Awrupadağı här kvadrat santimetr cir imin bulırğa tiyeş”,– dide.
Ul: "Xäzer bezgä sälätlär buşlıqların niçek tutıraçaqbız häm niçek alğa barabız, şul turıda Awrupa külämendä ğamäldä bulırlıq plan kiräk”, – dip östäde.
