İranğa qağılışlı êşçänlek başqarğan keşe xoquqları oyışması çärşämbe könne İrandagı protestlarda ülüçelär sanınıñ 38gä citüen xäbär itte.
AQŞta urnaşqan oyışmanıñ internet säxifäsendä bastırılğan xisapta rizasızlıq belderü çaralarınıñ il külämendä 11 kön däwam itüe äytelä.

Xisapta 31 provinśiyäneñ barısında da protestlar ütkärelüe, 34 protestçı belän 4 iminlek xezmätkäreneñ ğömeren yuğaltuı äytelä.

348 törle urında oyıştırılğan çaralarda distälägän keşe yaralanğan häm 2 217 keşe qulğa alınğan.

Xisapqa kürä, yaralanularnıñ kübese plastik pulyalar arqasında kilep çıqqan.
Wäqalätlelär ülüçelär häm yaralanuçılar turında belderü yasamadı.

AQŞ ilbaşı Donal'd Tramp comğa könne, Tähran protestçılarğa qarata ütergeç köç qullanğan oçraqta, Vaşingtonnıñ protestçılarğa yärdämgä kiläçägen äytte.

Bu belderü İrannıñ yuğarı däräcädäge räsmiläreneñ açuın çıgardı.
İranda soñğı atnalarda iqt’isadınıñ naçarayuı häm rialnıñ dollarğa qarata tiz arada qıymmät yuğaltuı säbäple kiñ külämle protestlar küzätelä.