Bötendönya azıq-tölek programması häm Ğazzäle räsmi zatlar ut tuqtağan töbäktäge gumanitar krizisnı ciñeläytüne maqsat itüenä qaramastan İzrailneñ koridorlarnı yabıq totuı arqasında yärdämneñ planlaştırılğannan äz kerüen äytte.
Bötendönya azıq-tölek programması süzçese Abeer Etefa sişämbe könne belderü yasap, Ğazzägä kergän yärdäm miqdarınıñ könenä kiräkle bulğan 2 meñ tonnadan bik äz buluın citkerde.
“Bu maqsatqa ireşü öçen xäzerge waqıtta här çik buyı qapqasın qullanu zarur,” – digän Etefa barı tik “Kerem Şalom” häm “Kissufim” koridorlarınıñ aktiv buluın assızıqladı.
Qıtlıq däwam itkän Ğazzäneñ tönyağına isä ireşü bötenläy yuq.
Ğazzä xökümäteneñ media ofisı beldergänçä utnı tuqtatu ğamälgä kergännän soñ töbäkkä barı tik 986 yök maşinası kerde häm bu san kileşüdä urın alğan 6600 yök maşinasına küpkä citmi.
Belderüdä bolay diyelä: “Här kön Ğazzägä urtaça 89 maşina kerde, kileşügä kürä 600 yök maşinasınıñ kerüe kiräk. Bu çikläwlär İzrail alıp barğan problema tudıru, açlıq häm gumanitar şantaj säyäsäteneñ isbatı bulıp tora.”
Ğazzädäge Fälästin xökümäte azıq-tölek, mediŝina materialı, yağulıq häm yärdäm materialların da kertep könenä kim digändä 600 maşinalıq yärdämneñ däwamlı kerüen täêmin itep, keşeçä yäşäw öçen kiräk bulğan ixıtyaclarnı garantiyalärgä çaqırdı.
Qatar Ämire Şäyx Tämim bint Xamäd Al Tani sişämbe könne İzrailneñ ğamällären ğayepläp, bolarnı utnı tuqtatunı häm xalıqara xoquqnı bozu dip atadı.
Ğazzädäge Fälästinneñ sälamätlek saqlaw ministrlığına kürä utnı tuqtatu 10 oktäbrdä ğamälgä kergännän birle 80 fälästinle ülde häm 300dän artıq keşe yaralandı.
