Yök maşinası xucaları soñğı tapqır yäkşämbe könne yanawlarğa duçar qaluların äytte, älege höcümdä maşina berençe tapqır zıyan kürde.

“7News” pänceşämbe könne yasağan belderügä kürä Awsrtaliyaneñ Sidney şähäre könbatışında östenä Fälästin bayrağı töşerelgän häm “Bäysez Fälästin” dip yazılğan yök maşinasına ut törtelgän. Maşina xucaları höcümneñ säyäsi maqsatlı buluın uylıy.

İminlek kameralarında Darruk rayonında ber şöbhäle keşeneñ maşina yanına kilüen häm astında molotov kokteyle ırğıtuın kürep bula. Ut törtüçe maşina yana başlağaç qaça.

İke yıldan artıq “Bäysez Fälästin” yazuları belän yörüçe yök maşinası onlayn platformalarda bäxäslärgä säbäpçe buldı häm yanawlar alğan ide. Maşina xucaları soñğı yanawnıñ yäkşämbe könne yasaluın läkin maşinanıñ berençe tapqır zıyan kürüen belderde.

Xucalardan berse bolay dide: “Bu - tınıç maqsatlı protestka, süz iregenä qarağan näfrätle höcüm.”

Poliśiya höcümneñ säyäsi maqsatı bulıp bulmawın älegä açıqlamadı, tikşerüneñ däwam itüen citkerde.

Awstraliya 21 sentäbr könne premyer-ministr Êntoni Albaniznıñ X platformasında bäysez häm möstqıyl Fälästin däwläten räsmi räweştä tanuın beldergän ide.

Awstraliyaneñ İslamofobiya belän köräş öçen bilgelägän berençe maxsus wäkile Aftab Malik 13 sentäbrdä belderü yasap, ilneñ İslamofobiya problemasın berqayçan da çın mägnädä quzğatmawın äytte häm: “Awstraliyadä İslamofobiya härwaqıt problema buldı; qayçaq bitaraf qaldılar, qayçağında kire qaqtılar läkin berqayçan da çın mägnädä quzğatmadılar,” – dide.

İldäge Yähüd şurası pänceşämbe könne X platformasında yasağan belderüdä Ministrlar kabinetına 80 bitlek ber dokument häm 2700dän artıq imza tapşıruların, Ğazzädäge genośidnı tuqtatu öçen İzrailgä sankśiyaneñ kertelüen taläp itülären citkerde.

Şura düşämbe könne yasağan belderüendä Awstraliya xökümäten İzraille räsmi zatlarğa sankśiya kertergä, İzrail belän qoral säwdäsen beterergä häm Tel-Aviv citäkçelegen xalıqara xoquqnı bozuı arqasında cawaplı totarğa çaqırdı.