AQŞ tarixında iñ köçle ilbaşı urınbasarlarınnan berse dip sanalğan häm Djordj Buşnıñ 11 sentyabr’ höcümnärennän soñ Äfğanstan häm Ğıyraqta cimergeç suğışlar alıp barğan çorda urınbasarı bulğan Dik Çeyni düşämbe könne wafat bulğan.
Çeyni 84 yäşendä ide.
Gadättä zur ähämiyätkä iyä bulmağan dip sanalğan ilbaşı urınbasarı wazıyfasın iskitkeç nığıtqan öçen küplär anı säxnä artındağı zur köç dip bäyäläde.
Buş AQŞnı “terrorğa qarşı köräş” iseme astında bäxäsle yulğa kertep cibärgändä, Çeynineñ täêsire Guantanamo törmäse, cäzalap intekterü häm qanunsız saq astına alular kebek qara ğamällärdä çağıldı.
Sul qaraşlı küp keşedä näfrät tudırğan bu şäxes, ğomereneñ soñğı yıllarında kisken borılış yasap, Donal'd Trampnıñ 2024 yılda Aq Yortqa qabat ilbaşı bularaq qaytu kampaniyäsenä qarşı çıqtı.
AQŞ mäğ’lümat çaraları Çeynineñ ğailäse belderüenä nigezlänep, êlekkege Kongress äğ’zası häm saqlanu ministrı bulğan Çeynineñ pnevmoniya häm yöräk-qan tamırları awırularınnan wafat buluın citkerde.
Belderüdä bolay diyelä: “Dik Çeyni — Aq Yort ğomum särqatibe, Wyoming kongress äğ’zası, saqlanu ministrı häm Amerika Quşma Ştatları ilbaşı urınbasarı bularaq, däwlätebezgä distä yıllar xezmät itte”.
AQŞnıñ 46-nçı ilbaşı urınbasarı bulğan Çeyni, 2001–2009 yıllar arasında ike märtäbä bu wazıyfanı başqarğan.
