Rusiyä häm töp berlektäşe Belarus comğa irtänge sägätlärdä zur däräcädäge urtaq xärbi künegülärne başlattı. Bu adım Polşa Mäskäwne hawa kiñlegenä dronnar cibärep, kiyerenkelekne üsterüdä ğayeplägännän soñ NATOğa sörän saldırdı.

“Zapad” künegüläre Rusiyä köçläre Ukrainadağı kiñ front liniyasennän alğa barğan häm Ukraina şähärlärenä hawadan höcümnärne arttırğan waqıtqa turı kilde.

Belarus kürşese bulğan NATO äğzaläre Polşa, Litva häm Latviya başqala Minsknıñ könçığışındağı Borisov rayonı yanında uzaçağı açıqlanğan xärbi künegülär arqasında sörän saldı.

Öç ildä dä xärbi künegülärdän alda iminlek çaraları arttırıldı, Polşa künegülär waqıtında Belarus çigeneñ yabıluına ämer birde.

Rusiyä Saqlanu ministrlığı belderü yasap: “Rusiyä häm Belarus armiyaläreneñ urtaq strategik manyevrları başlandı,” – dide.

Polşa premyer-ministrı Donald Task ilen kritik könnär turında kisätte.

Task çärşämbe könne irtänge sägätlärdä Polşa häm NATO berlektäşläreneñ hawa kiñlegenä kergän Rusiyä dronnarın bärep töşerü öçen xärbi oçqıçlarına sörän saldırğannan soñ İkençe bötendönya suğışınnan bügengä qadär berençe tapqır açıq bäreleşkä bu xätle yaqın buluların äytte.

Mäskäw citäkçelege älege borçularğa iğtibar itmäde.

Kreml süzçese Dmitriy Peskov: “Bolar – planlaştırılğan xärbi künegülär, bernindi ilne maqsat itep almıy” - dip belderde häm Polşanıñ künegülärne agressiv köç kürsätü dip atawın kire qaqtı.

Ukraina ilbaşı Volodimir Zelenskiy da Mäskäw citäkçelegeneñ niyäte mäs’äläsendä kisätü yasap: “Rusiyäneñ mondıy ğamälläre qatğıy räweştä saqlanu öçen tügel, Ukrainağa ğına qarşı da tügel,” – dide.

Rusiyä isä ber töndä üz cirlärendä 221 Ukraina dronınıñ bärep töşerelüen äytte.

Ğomumän 4 yılda ber tapqır uzuçı “Zapad” xärbi künegüläre Ukrainadağı suğış waqıtında berençe künegü buldı häm 16 sentäbrgä qadär baraçaq.

Mäskäw citäkçelege suğış başlanğançı 2021 yılda oxşaş xärbi künegülärgä 200 meñ ğaskärine cibärgän ide.

Läkin bıyılğı künegülärneñ tağın da keçkenä külämle buluı kötelä çönki 100 meñlägän Rusiyä ğaskäriye Ukrainada.

Belarus ğıynwar ayında künegülärdä 13 meñ ğaskärineñ qatnaşaçağın açıqladı läkin mayda bu sannıñ yaqınça yartısı bulaçağın citkergän ide.

Ağımdağı yılnıñ başlarında däwlät mediası Belarus saqlanu ministrınıñ künegülärneñ kiyerenkelekne kimetü öçen Polşa häm Ukraina çiklärennän yıraqta uzdırılaçağın açıqlawın beldergän ide.

Läkin Polşa yänä dä Belarus belän bulğan berniçä çik buyı qapqasın yaptı häm könçığıştağı çiktä hawa transportın kimette.

Litva häm Latviya da öleşçä hawa kiñlegen yabuların iğlan itte.

Rusiyäneñ Belarusta taktik atom-töş qorallar urnaştıruı isä künegülärgä yaña ülçäm kiterde.

Minsk citäkçelege avgustta belderü yasap, xärbi künegülärdä Rusiyäneñ yaña atom-töş başçalı raketaları “Oreşnik” belän atom-töş höcüm belemeneñ dä bulaçağın citkerde.