“Xamas” häm aradaşçılar arasında Ğazzä suğışın tuqtatu turında berençe söyläşülär Misırda "uñay atmosfera" belän tämamlandı, dip xäbär itte Misır däwlätenä bäyle mäğlümat çaraları.
“Al-Qahera News” xäbär itkänçä, söyläşülär Qızıl diñgez buyında urnaşqan Şarm äl-Şäyex şähärendä uzğan häm köndez däwam itäçäk.
Düşämbe könne şähärgä İzrail wäkilläre dä kilep citkän, alar turıdan-turı bulmağan söyläşülärdä qatnaşa.
Söyläşülär AQŞ ilbaşı Donald Tramp täqdim itkän ozaq waqıtqa suğışnı tuqtatu häm İzrail belän “Xamas” arasında totqınnar almaşu planına nigezlängän.
'Uñay atmosfera'
Misır mäğlümat çaraları xäbär itkänçä, aradaşçılar häm “Xamas” arasındağı oçraşular näticäle bulğan häm xäzerge söyläşülär öçen yul kartası bilgelängän.
“Xamas” wäkilläre aradaşçılarğa Ğazzädä İzrail höcümnäreneñ däwam itüeneñ totqınnar almaşu turındağı söyläşülärgä zur kirtä bulıp toruın beldergän.
“Xamas” häm İzrail arasında turıdan-turı bulmağan söyläşülär düşämbe kiçen Misır, Qatar häm AQŞ qatnaşında başlandı.
Bu söyläşülär Tramp täqdim itkän planınıñ tormışqa aşuı öçen şartlar tudıruğa yünältelgän.
Tramp: 'Zur alğa kiteş'
Tramp, düşämbe kiçendä Aq Yortta çığış yasap, Ğazzä kileşüe turında "zur alğa kiteş" bar dip sanawın belderde.
"Minemçä, Ğazzä kileşüe nisbätennän êşlär bik yaxşı bara," – dide ul jurnalistlarğa, “Xamas”nıñ "uñay êş itüe" häm "möhim närsälärgä" rizalaşuın assızıqlap.
Ul plan turında "barısı da qabul itä torğan gacäyep kileşü" dip äytte häm bar yaqlarnıñ anı tormışqa aşırırğa tırışuın belderde.
Tramp genotsidçı Binyamin Netanyaxunıñ bu täqdimgä "uñay" qarawın äytte häm Törkiyä ilbaşı Räcäp Tayyip Ärdoğan belän dä söyläşüen, anıñ Ğazzä kileşüe öçen "tırışuın" belderde.
